آمريڪي عدالت 75 ملڪن جي مهاجر ويزا جي ڪارروائي روڪڻ واري ٽرمپ انتظاميا جي پاليسي رد ڪري ڇڏي آهي

خبر ايجنسي موجب جن 75 ملڪن جي مهاجر ويزا جي ڪارروائي روڪڻ واري پاليسي رد ڪئي وئي، انهن ۾ پاڪستان، بنگلاديش، ايران ۽ روس پڻ شامل آهن.

نيويارڪ جي ضلعي جج گذريل ڏينهن ٽرمپ انتظاميا جي ويزا پاليسي کي ڪالعدم قرار ڏيندي چيو ته اها پاليسي پرڏيهي معاملن واري وزير مارڪو روبيو جي قانوني اختيارن کان تجاوز ڪري ٿي. جج موجب جنوري ۾ لاڳو ڪيل ويزا پاليسي واضح طور غير قانوني هئي ۽ اها وفاقي اميگريشن قانون سان ٽڪراءَ ۾ هئي.

خبر ايجنسي موجب آمريڪي جج اهو فيصلو مهاجرن جي حقن لاءِ ڪم ڪندڙ تنظيمن طرفان داخل ڪيل ڪيس ۾ ٻڌايو. آمريڪي پرڏيهي کاتي جو موقف هو ته پاليسي ۾ شامل ملڪن جا شهري آمريڪا لاءِ عوامي بوجھ بڻجي سگهن ٿا، جنهن سبب 75 ملڪن لاءِ آمريڪي مهاجر ويزا جي ڪارروائي جنوري کان روڪي وئي هئي.

ٻئي طرف آمريڪي عدالت جي فيصلي تي آمريڪي پرڏيهي کاتي طرفان اڃا تائين ڪو تبصرو ناهي ڪيو ويو.