ملڪ ۾ رمضان المبارڪ جي شروعات ٿي وئي آهي ۽ هي مهينو ٻين پهلوئن سان گڏ صحت لاءِ به تمام اهم هوندو آهي.
هن سڄي مهيني ۾ ماڻهن جي غذا ۽ ننڊ بابت عادت تبديل ٿي ويندي آهي ۽ لاپرواهي سبب صحت تي ناڪاري اثر به پوندو آهي.
توڙي جو هيل رمضان ۾ موسم وڌيڪ گرم رهڻ جو امڪان ناهي پر پوءِ به جسم ۾ پاڻي جي کوٽ يا ڊي هائڊريشن جو امڪان هوندو آهي، تنهن ڪري روزو رکڻ مهل ڪجهه اهڙيون غذائون استعمال ڪجن، جيڪي جسماني توانائي برقرار رکڻ سان گڏ پاڻي جي کوٽ کان به تحفظ ڏئي سگهن.
سحري ۾ اهڙي غذا جي چونڊ ڪيو، جيڪا صحت لاءِ فائديمند هجڻ سان گڏ پيٽ تي بار ثابت نه ٿئي، مثال طور سبزيون، داليون، ڏهي، ڪيلا، کيرو، ٽماٽو، هنداڻو وغيرا، اهڙين غذائن سان جسم ۾ پاڻي جي کوٽ جو امڪان گهٽجي ويندو آهي ۽ توانائي به ملندي آهي.
گڏوگڏ سحري ۾ هڪ کان ٻه خارڪون ضرور کائو، ڇو ته ان ۾ ڪاپر ۽ ميگنيشم سميت ڪيترائي غذائي جزا هوندا آهن، جنهن ۾ موجود مٺاڻ جسم ۾ گلوڪوز جي شڪل اختيار ڪري توانائي فراهم ڪندو آهي.
سحري ۾ وڌيڪ مرچن، وڌيڪ لوڻ ۽ وڌيڪ کنڊ وارين غذائن کان پاسو ڪجي، ڇو ته انهن سان اڃ جو احساس وڌيڪ محسوس ٿيندو.
سحري ۾ مناسب مقدار ۾ پاڻي پيئڻ نه وساريو، ڊي هائيڊريشن کان بچڻ جو سادو ۽ سٺو طريقو مناسب مقدار ۾ پاڻي پيئڻ آهي.
ننڊ متاثر ٿيڻ جي خيال سان سحري ڪڏهن به نه ڇڏيو، ڇو ته ان وقت جي غذا سڄي ڏينهن جي جسماني ضرورتن لاءِ اهم هوندي آهي.
