بالي ووڊ اداڪارا ۽ بي جي پي جي ميمبر پارليامينٽ ڪنگنا رناوت ڀارت جي جين زي کي ’گٽر جنريشن‘ قرار ڏيڻ واري پنهنجي بيان تي هڪ ڀيرو ٻيهر وضاحت ڏني آهي. ڪجهه ڏينهن اڳ شاگردن جي تنظيم ’ڪاڪروچ جنتا پارٽي‘ (سي جي پي) طرفان نئين دهلي ۾ پيپر ليڪ واري معاملي تي سخت احتجاج ڪيو ويو هو، جنهن تي ڪنگنا رناوت جين زي کي ’گٽر جنريشن‘ قرار ڏنو هو. سندس بيان کانپوءِ سوشل ميڊيا صارفين سان گڏ شوبز انڊسٽري جي مشهور شخصيتن به کيس تنقيد جو نشانو بڻايو. سخت تنقيد کانپوءِ ڪنگنا جين زي جي تعريف ڪندي چيو هو ته کيس خوشي آهي ته نوجوان نسل باشعور آهي ۽ معاملن کي سمجهي ٿي. تنهن هوندي به هاڻي ڪنگنا رناوت ٻيهر جين زي کي ’گٽر جنريشن‘ سان ڀيٽيندي نئون تڪرار پيدا ڪري ڇڏيو آهي. ميڊيا سان ڳالهائيندي هن چيو ته جيڪي ماڻهو پاڻ کي ڪاڪروچ چون ٿا ۽ اسان چوندا آهيون ته ڪاڪروچ گٽرن مان نڪرندا آهن ته ان ۾ غلط ڇا آهي؟ اداڪارا وڌيڪ چيو ته هوءَ پاڻ کي ڪاڪروچ نٿي سمجهي، جيڪڏهن ڪو کيس چوي ته هوءَ گٽر ۾ رهي ٿي ته هوءَ ان جي ترديد ڪندي، پر جيڪڏهن ڪو پاڻ کي ڪاڪروچ هجڻ جو دعويٰ ڪري ٿو ته فطري طور تي هو گٽر ۾ ئي رهندو، ٻيو ڪٿي رهندو؟
