بالي ووڊ اداڪارا ڪرينا ڪپور پنهنجي ٽئين حمل بابت هلندڙ افواهن تي خاموشي ٽوڙي ڇڏي آهي
ڀارتي ميڊيا موجب تازو ڪرينا ڪپور جي جم ٻاهران هڪ وڊيو وائرل ٿي، جنهن کانپوءِ مداحن طرفان سندس ٽئين حمل بابت قياس آرائيون شروع ٿي ويون.
ميڊيا رپورٽن موجب ڪرينا ڪپور ۽ سندس مڙس اداڪار سيف علي خان پنهنجي ٻارن تيمور ۽ جهانگير سان گڏ سمنڊ ڪناري موڪلون گذاري ممبئي واپس موٽيا آهن.
وائرل وڊيو ۾ اداڪارا کي جم جي لباس ۾ گاڏي ڏانهن ويندي ڏٺو ويو، ان دوران سندس وزن ۾ واڌ مداحن جي خاص ڌيان جو سبب بڻجي.
افواهون پکڙجڻ کانپوءِ ڪرينا ڪپور جي ويجهن ذريعن ”هندوستان ٽائمز“ کي سندس ٽئين حمل بابت وضاحت ڏني.
ذريعن موجب ڪرينا ڪپور حامله ناهي ۽ ٽئين حمل بابت هلندڙ خبرون بلڪل درست ناهن.
ڀارتي ميڊيا موجب ڪرينا ڪپور ماضي ۾ هڪ انٽرويو دوران پنهنجي خانداني منصوبن بابت ڳالهائيندي واضح ڪيو هو ته هوءَ وڌيڪ ٻار نٿي چاهي.
