پاڪستان جي اڳوڻي اداڪارا ۽ حمزه علي عباسي جي گهرواري نيمل خاور پنهنجي وزن کي بحث جو موضوع بڻائيندڙ ماڻهن کي تنقيد جو نشانو بڻايو آهي
تازو نيمل خاور پنهنجي سوشل ميڊيا اڪائونٽ تي هڪ تقريب جون ڪجهه تصويرون پوسٽ ڪيون، جيڪي سوشل ميڊيا تي وائرل ٿي ويون. ڪيترن ئي پيجز انهن تصويرن کي شيئر ڪندي اندازو لڳايو ته شايد نيمل خاور اميد سان آهي.
انهن افواهن کانپوءِ اڳوڻي اداڪارا انسٽاگرام اسٽوري ذريعي اهڙن پيجز کي سخت جواب ڏنو. نيمل خاور چيو ته اها ڳالهه حيران ڪندڙ آهي ته ماڻهو عورتن جي جسم بابت تبصرو ڪندي ڪنهن به قسم جي هٻڪ محسوس نٿا ڪن. هن چيو ته سندس وزن ۾ تبديلي ٿي سگهي ٿي ۽ ضروري ناهي ته هوءَ اڄ به پنج سال اڳ وانگر نظر اچي.
نيمل خاور وڌيڪ چيو ته ماءُ بڻجڻ عورت جي جسم ۾ ڪيترين ئي تبديلين جو سبب بڻجي سگهي ٿو، جڏهن ته عمر، هارمونز، ذهني دٻاءُ، صحت، طرزِ زندگي ۽ حمل سميت مختلف عنصر به جسماني تبديلي جو سبب بڻجي سگهن ٿا. سندس چوڻ هو ته انهن مان ڪنهن به سبب جي بنياد تي ڪنهن عورت جي جسم يا وزن کي سرعام تنقيد جو نشانو بڻائڻ جو حق ڪنهن کي به نٿو ملي.
