وفاقي ۽ صوبائي حڪومتن سان ڳالهيون ناڪام ٿيڻ کانپوءِ گڊز ٽرانسپورٽرز جي هڙتال ڇهين ڏينهن ۾ داخل ٿي وئي آهي. گڊز ٽرانسپورٽرز جي صدر نبيِل محمود طارق جو چوڻ آهي ته حڪومت سان ڳالهيون ڊيڊ لاڪ جو شڪار آهن، حڪومت ڊيزل جي قيمتن ۾ روزاني تبديلي ختم ڪرڻ تي تيار ناهي، جنهن سبب هڙتال غيرمعيّن مدت تائين جاري رهندي. هن چيو ته حڪومت جي لچڪ نه ڏيکارڻ سبب ڳالهيون ناڪام ٿيون، جڏهن ته حڪومت ٽول ٽيڪس ۾ گهٽتائي يا ان جي شرح هڪ سال تائين برقرار رکڻ تي به راضي ناهي. سندس چوڻ هو ته حڪومت ڪسٽمز ۽ لوڊ ايڪسل تي معمولي رعايت جي ڳالهه ڪري رهي هئي، جيڪا ٽرانسپورٽرز کي قبول ناهي. گڊز ٽرانسپورٽرز جي هڙتال سبب ڀاڄين ۽ ميون جي ترسيل متاثر ٿي رهي آهي، جنهن سان قيمتن ۾ واڌ جو رجحان ڏسڻ ۾ اچي رهيو آهي. بلوچستان ۾ هڙتال سبب ڪڪڙ سميت ڪجهه کاڌي پيتي جي شين جون قيمتون وڌي ويون آهن، جڏهن ته ڪوئيٽا ۾ ڪڪڙ جو گوشت 500 کان وڌي 550 رپيا في ڪلو ٿي ويو آهي. ٻئي طرف ڪراچي ۾ ننڍين گاڏين ذريعي ڀاڄين جي ترسيل جاري آهي.