بالي ووڊ اداڪار سيف علي خان انڪشاف ڪيو آهي ته دنيا ۾ جاري جنگين ۽ ڇڪتاڻ واري صورتحال سبب سندس پٽ تيمور علي خان ۽ جي خوفزده رهن ٿا. 56 ورهين جي سيف علي خان پنهنجي گهرواري ڪرينا ڪپور خان سان گڏ ٻنهي پٽن تيمور ۽ جي بابت ڳالهائيندي دنيا ۾ جاري بحرانن تي ڳڻتي جو اظهار ڪيو. اين ڊي ٽي وي جي پروگرام جي سلسلي ۾ ڄمون ۽ ڪشمير جي علائقي اُڙي جي دوري دوران ڳالهائيندي سيف علي خان ٻڌايو ته سندس ٻار دنيا ۾ جاري ڪيترين ئي جنگين بابت سوال ڪندا آهن ۽ موجوده صورتحال کان خوفزده پڻ آهن. سيف علي خان چيو ته سندس ٻار پڇن ٿا ته اسان جي حفاظت ڪير ڪري رهيو آهي؟ اڳتي ڇا ٿيندو؟ ڇا صورتحال وڌيڪ خراب ٿي ويندي؟ اداڪار جا اهي بيان اهڙي وقت سامهون آيا آهن، جڏهن 28 فيبروري کان جاري آمريڪا، اسرائيل ۽ ايران وچ ۾ جنگ سبب پڻ دنيا ۾ ڳڻتي وڌي وئي آهي.