چيٽ جي پي ٽي دنيا جو مشهور آرٽيفيشل انٽيليجنس (AI) اسسٽنٽ آهي، جنهن کي مسلسل بهتر بڻايو پيو وڃي. هاڻي ان ۾ اهڙو نئون فيچر شامل ڪرڻ تي ڪم جاري آهي، جيڪو صارفين لاءِ خاص طور تي حساس معلومات واري چيٽس کي محفوظ رکڻ ۾ مددگار ثابت ٿي سگهي ٿو.

اينڊرائيڊ اٿارٽي جي رپورٽ موجب چيٽ جي پي ٽي جي اينڊرائيڊ ايپ ۾ نئين فيچر جا اشارا مليا آهن، جنهن تحت صارف پنهنجي حساس چيٽ کي پن ڪوڊ يا فنگر پرنٽ اسڪين ذريعي لاڪ ڪري سگهندا.

رپورٽ موجب ايپ ۾ ”Lock Chats“ ۽ ”Protect Chats“ جهڙا آپشن نظر آيا آهن. ڪنهن چيٽ کي لاڪ ڪرڻ کانپوءِ ان جو عنوان ۽ مواد سائڊ بار، چيٽ هسٽري ۽ سرچ نتيجن ۾ نظر نه ايندو.

چيٽ جي پي ٽي ۾ اڳ ئي Temporary Chats جو فيچر موجود آهي، جنهن ۾ چيٽ بند ڪرڻ کانپوءِ مواد ڊليٽ ٿي ويندو آهي ۽ اڪائونٽ ۾ پڻ نظر نه ايندو. جڏهن ته لاڪ چيٽس جو مقصد حساس معلومات کي وڌيڪ وقت تائين محفوظ رکڻ هوندو.

في الحال هن فيچر بابت وڌيڪ تفصيل سامهون نه آيا آهن ۽ اهو پڻ واضح ناهي ته لاڪ ٿيل چيٽس ۾ ميموري ۽ ريڪال فيچرز ڪيئن ڪم ڪندا. اهو به معلوم ناهي ته هي فيچر صارفين لاءِ باضابطه طور ڪڏهن متعارف ڪرايو ويندو.