واٽس ايپ ۾ آرٽيفيشل انٽيليجنس (AI) ٽيڪنالاجي تي ٻڌل نئون فوٽو ايڊيٽنگ فيچر متعارف ڪرايو ويو آهي. WABetaInfo جي رپورٽ موجب اينڊرائيڊ ڊوائيسز لاءِ واٽس ايپ جي نئين بيٽا ورزن ۾ AI تي ٻڌل فوٽو ايڪسپينشن ٽول شامل ڪيو ويو آهي. هن ٽول ذريعي صارف پنهنجي موجوده تصويرن کي چيٽس ۽ اسٽيٽس لاءِ 9:16 فارميٽ ۾ تبديل ڪري سگهندا. هي فيچر ايپ جي اميج ڊرائنگ ايڊيٽر ۾ موجود هوندو، جتي اينيميٽ ۽ بئڪ گرائونڊ آپشنز سان گڏ نظر ايندو. صارف کي تصوير ايڊيٽر ۾ کولڻ کانپوءِ فلٽر سيڪشن مان هن ٽول تائين رسائي حاصل ڪرڻي پوندي. ميٽا AI تصوير جو تجزيو ڪري ان کي 9:16 فارميٽ ۾ تبديل ڪندو. جيڪڏهن صارف نتيجي کان مطمئن نه هجي ته ٽول ٻيهر استعمال ڪري سگهندو. رپورٽ موجب هي فيچر پهريان اسٽيٽس لاءِ دستياب ٿيندو ۽ ان کانپوءِ چيٽس ۾ متعارف ڪرايو ويندو. في الحال هي فيچر بيٽا ورزن ۾ آهي، تنهنڪري عام صارفين لاءِ ان جي دستيابي جي حتمي تاريخ واضح ناهي.