چين جي سائنسدانن هڪ انقلابي ٽيڪنالاجي تيار ڪئي آهي جيڪا سامونڊي کاري پاڻي کي بغير بجلي جي پيئڻ لائق تازو پاڻي ۾ تبديل ڪري سگهي ٿي. رپورٽن موجب روايتي طور سامونڊي پاڻي مان لوڻ الڳ ڪرڻ لاءِ وڏي مقدار ۾ توانائي گهربل هوندي آهي، جنهن سبب اهڙا منصوبا گهڻو ڪري امير ملڪن تائين محدود رهندا آهن ۽ ماحول لاءِ نقصانڪار ٻارڻ جو استعمال به وڌي ويندو آهي. پر چائنيز اڪيڊمي آف سائنسز ۽ شينزين يونيورسٽي جي ماهرن هڪ اهڙو پروٽوٽائپ سسٽم تيار ڪيو آهي جيڪو رڳو سج جي روشني تي هلي سگهي ٿو ۽ هڪ سال تائين بغير ڪنهن اضافي توانائي جي ڪم ڪرڻ جي صلاحيت رکي ٿو. محققن نئين فوٽو ٿرمل مواد ۽ نينو پارٽيڪلز کي ٽن-رخن واري ڍانچي سان جوڙي هڪ اهڙو نظام تيار ڪيو جنهن سان سامونڊي پاڻي مان لوڻ ڪڍڻ جو عمل وڌيڪ اثرائتو بڻجي ويو. تجربن دوران هن مواد سج جي گرمي جو 90.2 سيڪڙو جذب ڪيو، جڏهن ته پاڻي صاف ڪرڻ لاءِ گهربل توانائي ۾ 45.7 سيڪڙو گهٽتائي آئي. ننڍي پيماني تي ڪيل آزمائشي منصوبي ۾ هن سسٽم ذريعي تيار ڪيل تازو پاڻي زرعي زمين لاءِ استعمال ڪيو ويو، جتي ڪيترن هفتن تائين بنا بجلي جي صرف سج جي روشني سان پاڻي فراهم ڪيو ويو. سائنسدانن جو چوڻ آهي ته هن طريقي سان حاصل ٿيندڙ پاڻي جي لاڳت بوتل بند پاڻي خريد ڪرڻ کان به گهٽ آهي ۽ وڏي پيماني تي استعمال سان خرچن ۾ وڌيڪ بچت ممڪن ٿيندي.