دنيا جي مشهور ٽيڪنالاجي ڪمپني گوگل پنهنجي آرٽيفيشل انٽيليجنس تي ٻڌل تصويرون ٺاهڻ واري ٽول “نينو بنانا” جو نئون ۽ وڌيڪ تيز ورزن “نينو بنانا 2 لائيٽ” متعارف ڪرائي ڇڏيو آهي. ڪمپني موجب هي نئون ماڊل اڳوڻي ورزن جي ڀيٽ ۾ نه رڳو وڌيڪ تيز آهي، پر ان جي استعمال جي لاڳت به نمايان حد تائين گهٽ آهي، جنهن سبب صارف گهٽ خرچ ۾ وڏي تعداد ۾ تصويرون تيار ڪري سگهن ٿا.

گوگل جو چوڻ آهي ته نينو بنانا 2 لائيٽ صرف 4 سيڪنڊن اندر هڪ تصوير تيار ڪرڻ جي صلاحيت رکي ٿو، جنهن ڪري هي ماڊل خاص طور تي انهن صارفين لاءِ فائديمند هوندو جيڪي تيزي سان سوين يا هزارين تصويرون ٺاهڻ چاهين ٿا. ڪمپني جي انگن اکرن موجب هن نئين ماڊل ذريعي هڪ هزار تصويرون تيار ڪرڻ جي لاڳت رڳو 0.034 آمريڪي ڊالر آهي، جيڪا روايتي تصويري جنريشن ماڊلز جي ڀيٽ ۾ تمام گهٽ سمجهي وڃي ٿي.

ياد رهي ته گوگل گذريل سال اونهاري ۾ اصل نينو بنانا متعارف ڪرايو هو، جڏهن ته فيبروري 2026ع ۾ نينو بنانا 2 جاري ڪيو ويو. هاڻي ڪمپني ان جو وڌيڪ تيز ۽ سستو ورزن نينو بنانا 2 لائيٽ مارڪيٽ ۾ آندو آهي، جنهن جو مقصد وڏي پيماني تي تصويرن جي تياري کي آسان ۽ سستو بڻائڻ آهي.

گوگل طرفان نينو بنانا پرو پڻ پيش ڪيو وڃي ٿو، جيڪو وڌيڪ طاقتور ۽ جديد فيچرز سان ليس ماڊل آهي، پر ان جي استعمال لاءِ صارفين کي ماهوار سبسڪرپشن فيس ادا ڪرڻي پوي ٿي. ان جي مقابلي ۾ نينو بنانا 2 لائيٽ عام صارفين لاءِ وڌيڪ سستو ۽ تيز متبادل فراهم ڪري ٿو.

ڪمپني موجب نينو بنانا 2 عام مقصدن لاءِ تيار ڪيو ويو آهي، جڏهن ته نينو بنانا 2 لائيٽ کي خاص طور تي تيز رفتاري سان وڏي تعداد ۾ تصويرون تيار ڪرڻ لاءِ ڊزائن ڪيو ويو آهي. هي نئون ماڊل گوگل اي آءِ اسٽوڊيو ۽ جيمنائي اي پي آءِ تي دستياب هوندو، جتي ڊولپرز ۽ صارف آساني سان ان جي سهولت مان فائدو حاصل ڪري سگهندا.

ان سان گڏ گوگل پنهنجي هڪ ٻي نئين اي آءِ ٽيڪنالاجي “جيمنائي اومني فليش” متعارف ڪرائڻ جو به اعلان ڪيو آهي، جيڪا ڪمپني جي مصنوعي ذهانت واري نظام کي وڌيڪ تيز ۽ ڪارائتو بڻائڻ جي ڪوششن جو حصو آهي. ماهرن جو خيال آهي ته گوگل جا اهي نوان ماڊل مستقبل ۾ ڊجيٽل مواد، گرافڪس ڊيزائن ۽ تخليقي صنعتن ۾ وڏيون تبديليون آڻي سگهن ٿا.