قومي ڪرڪيٽر محمد نواز آءِ سي سي جي اينٽي ڊوپنگ ضابطن جي ڀڃڪڙي جو اعتراف ڪندي بحالي پروگرام ۾ شرڪت ڪرڻ تي رضامندي ظاهر ڪئي آهي، جنهن کان پوءِ سندس عارضي معطلي ختم ڪئي وئي آهي.

آءِ سي سي موجب، 32 ورهين جي آل رائونڊر محمد نواز جو ڊوپ ٽيسٽ 7 فيبروري 2026ع تي سري لنڪا جي شهر ڪولمبو ۾ نيدرلينڊز خلاف آءِ سي سي مينز ٽي ٽوئنٽي ورلڊ ڪپ ميچ کان پوءِ ورتو ويو، جنهن ۾ سندس نموني ۾ هڪ ممنوعه مادو موجود هجڻ جي تصديق ٿي.

آءِ سي سي جي اينٽي ڊوپنگ ضابطن تحت، 7 فيبروري کان پهرين مئي 2026ع تائين محمد نواز جون سڀئي ميچ ڪارڪردگيون ۽ رڪارڊ رد قرار ڏنا ويا آهن.

آءِ سي سي موجب، محمد نواز اعتراف ڪيو آهي ته هن ممنوعه مادو راند کان ٻاهر استعمال ڪيو هو ۽ ان جو مقصد راند دوران ڪارڪردگي بهتر بڻائڻ نه هو.

ڪرڪيٽ جي عالمي اداري کيس ٽن مهينن لاءِ نااهل قرار ڏنو آهي، جڏهن ته اها سزا پهرين مئي 2026ع کان لاڳو سمجهي ويندي، ڇاڪاڻ⁠تہ ان تاريخ کان هن رضاڪارانه طور عارضي معطلي اختيار ڪئي هئي.

آءِ سي سي وڌيڪ چيو آهي ته جيڪڏهن محمد نواز ممنوعه مادي جي استعمال بابت بحالي پروگرام ڪاميابي سان مڪمل ڪندو ته سندس نااهلي جي مدت ٽن مهينن بدران هڪ مهينو تصور ڪئي ويندي.

آءِ سي سي موجب، محمد نواز بحالي پروگرام ۾ شرڪت ڪرڻ تي به رضامندي ظاهر ڪئي آهي، جنهن کان پوءِ سندس عارضي معطلي ختم ڪئي وئي آهي.