قومي ڪرڪيٽرن لاءِ ڊگهي مدي وارن ڪيمپن دوران پيڊل اسپورٽس کي لازمي قرار ڏنو ويو آهي، جڏهن ته نيشنل ڪرڪيٽ اڪيڊمي ۾ پيڊل اسپورٽس جي سهولت پڻ قائم ڪئي وئي آهي.

پيڊل اسپورٽس لاءِ قومي ڪرڪيٽرن کي هاڻي پري وڃڻ جي ضرورت نه پوندي، ڇو ته هو ڪرڪيٽ سان گڏ پيڊل اسپورٽس جو شوق به پورو ڪري سگهندا ۽ پنهنجي فٽنيس کي به بهتر بڻائي سگهندا.

ڊائريڪٽر هاءِ پرفارمنس عاقب جاويد جيو نيوز سان ڳالهائيندي چيو ته پيڊل اسپورٽس کيڏڻ ۾ آسان آهي ۽ فٽنيس لاءِ تمام فائديمند آهي. هن چيو ته اڳ رانديگر پيڊل کيڏڻ لاءِ پري ويندا هئا، پر هاڻي اها سهولت نيشنل ڪرڪيٽ اڪيڊمي ۾ ئي موجود آهي. اسان چاهيون ٿا ته ڊگهن ڪيمپن دوران رانديگرن کي اهڙو ماحول ۽ سهولتون ڏيون، جن سان سندن راند ۾ وڌيڪ بهتري اچي.

عاقب جاويد وڌيڪ چيو ته ڊگهي ڪيمپ دوران ضروري ناهي ته رانديگر صرف ڪرڪيٽ ئي کيڏن، تنهن ڪري هر ٻئي ڏينهن پيڊل اسپورٽس کيڏڻ لازمي هوندو، جتي رانديگر لڳ ڀڳ 40 منٽن تائين پيڊل کيڏي سگهندا. هن چيو ته هن راند سان فٽنيس بهتر ٿيندي ۽ رانديگرن جي موومينٽ ۾ بهتري ايندي، جنهن جو سڌو سنئون فائدو فيلڊنگ ۾ پڻ ملندو.

هن وڌيڪ چيو ته باسڪيٽ بال ڪورٽس به منصوبي جو حصو آهن ۽ باسڪيٽ بال کيڏڻ سان به ڪرڪيٽرن کي فائدو ٿيندو. ڪرڪيٽرن لاءِ هڪ گيم روم پڻ تيار ڪيو پيو وڃي، جتي سنوڪر سميت ٻيون رانديون به موجود هونديون.

عاقب جاويد چيو ته دنيا ڀر جا رانديگر صرف پنهنجي بنيادي راند تائين محدود ناهن هوندا، پر هو ٻين راندين ۾ به حصو وٺندا آهن ۽ انهن مان فائدو حاصل ڪندا آهن.