اسلام آباد (22 جولاءِ 2026): نوجوانن جي آن لائن تحفظ لاءِ پاڪستان ٽيلي ڪميونيڪيشن اٿارٽي (پي ٽي اي) ۽ ٽيڪنالاجي ڪمپني ميٽا هڪ اهم قدم کڻي ڇڏيو آهي.

پاڪستان ٽيلي ڪميونيڪيشن اٿارٽي (پي ٽي اي) ۽ ميٽا پاڪستان ۾ نوجوانن جي آن لائن تحفظ، ڊجيٽل خواندگي ۽ ڊجيٽل پليٽ فارمن جي ذميواراڻي استعمال کي هٿي ڏيڻ لاءِ گڏيل سهڪار تي ٻڌل فريم ورڪ تيار ڪرڻ خاطر ليٽر آف انٽينٽ تي صحيون ڪيون آهن.

هن گڏيل سهڪار ذريعي پاڪستان ۾ آن لائن مواد جي تحفظ سان لاڳاپيل معاملن تي باهمي ڳالهه ٻولهه، سهڪار ۽ اداري صلاحيتن کي وڌيڪ مضبوط بڻايو ويندو.

ان حوالي سان هڪ تقريب منعقد ڪئي وئي، جنهن دوران پي ٽي اي جي چيئرمين ميجر جنرل (رٽائرڊ) حفيظ الرحمان چيو ته هن شراڪت جو مقصد ڊجيٽل خواندگي کي هٿي ڏيڻ، ذميواراڻي آن لائن روين کي فروغ ڏيڻ ۽ خاص طور ٻارن ۽ نوجوان استعمال ڪندڙن لاءِ محفوظ ۽ ڀروسي جوڳو ڊجيٽل ماحول فراهم ڪرڻ آهي.

واضح رهي ته پي ٽي اي ۽ ميٽا گڏيل طور تي اداري صلاحيتن ۾ واڌ، پاليسي سطح جي ڳالهه ٻولهه، آگاهي مهمن ۽ نوجوانن جي آن لائن تحفظ ۽ ڊجيٽل ڀلائي بابت عالمي بهترين طريقن جي ڏي وٺ لاءِ مختلف قدم کڻندا.