گوگل ميپس هڪ تمام گهڻي ڪارآمد نيويگيشن ايپ آهي، جنهن ۾ ڪڏهن ڪڏهن ڪجهه مسئلن کي منهن ڏيڻو پئجي سگهي ٿو، پر اڪثر رستن جي صحيح رهنمائي ڪئي ويندي آهي

گذريل سالن دوران ان ۾ ڪافي تبديليون ڪيون ويون آهن يا نوان فيچر شامل ڪيا ويا آهن، جيئن يوزر انٽرفيس وڌيڪ بهتر بڻجي سگهي.

پر ان جو سڀ کان نمايان فيچر ايپ اندر ٽريفڪ جي مختلف رنگن جو آهي.

گوگل ميپس ۾ ڪيترائي بصري اشارا هوندا آهن، جن مان ڪنهن روڊ جي سطح، هاءِ وي، انڊر گرائونڊ سرنگ يا ريلوي وغيره بابت ڄاڻ ملي ٿي.

پر ان سان گڏ گوگل ميپس مخصوص رنگ پڻ استعمال ڪندو آهي، جن جي ذريعي ڊرائيورن کي خبر پوندي آهي ته ڪنهن هنڌ تي ٽريفڪ جي صورتحال ڪهڙي آهي.

گوگل ميپس جا بنيادي رنگ

ڪنهن هنڌ جي روڊن يا هاءِ ويز کي گرين لائينن سان ڏيکاريو ويندو آهي.

پر ان ۾ به فرق هوندو آهي، جيئن گهٽين يا ننڍن رستن لاءِ هلڪو گرين رنگ استعمال ڪيو ويندو آهي، جڏهن ته وڏن رستن لاءِ ڳاڙهو گرين رنگ استعمال ڪيو ويندو آهي.

ريلوي لائينن لاءِ پڻ هلڪو گرين رنگ استعمال ڪيو ويندو آهي، پر ٽريڪ لاءِ سنهيون لائينون استعمال ڪيون وينديون آهن، جيئن ماڻهن کي خبر پوي ته اهو ٽرين جو ٽريڪ آهي.

جيڪڏهن ٽريفڪ جي ڳالهه ڪجي ته ان لاءِ گوگل ميپس ۾ ليئرز بٽڻ استعمال ڪيو ويندو آهي.

سائو رنگ ان وقت استعمال ٿيندو آهي، جڏهن ٽريفڪ رواني سان هلي رهيو هوندو آهي ۽ اهو ظاهر ڪندو آهي ته ٽريفڪ ۾ ڦاسڻو نه پوندو.

پيلو يا نارنگي رنگ ظاهر ڪندا آهن ته گاڏيون هلن ته پيون، پر انهن جي رفتار معمول کان گهٽ آهي ۽ توهان کي معمولي دير جو منهن ڏسڻو پئجي سگهي ٿو. پيلو رنگ معمولي سست رفتاري، جڏهن ته نارنگي رنگ وڌيڪ ٽريفڪ جو اشارو ڏئي ٿو.

ڳاڙهو رنگ بنيادي طور خبرداري وارو رنگ آهي، جنهن مان خبر پوي ٿي ته ڪنهن هنڌ تي ٽريفڪ تمام گهڻي آهي ۽ سفر جو وقت وڌي سگهي ٿو، يعني ٽريفڪ جام جو امڪان آهي.

جيڪڏهن هلڪو ڳاڙهو رنگ هجي ته اها وڌيڪ ٽريفڪ جي نشاني آهي، جڏهن ته گهرو ڳاڙهو رنگ سخت ٽريفڪ جام جو اشارو ڏئي ٿو.

نيرو رنگ اصل ۾ ٽريفڪ سان لاڳاپيل ناهي، پر اهو رستي جي رهنمائي جو اشارو ڏئي ٿو.

گهرو نيرو رنگ ترجيحي يا چونڊيل روٽ لاءِ استعمال ڪيو ويندو آهي، جڏهن ته هلڪو نيرو رنگ متبادل رستن جي تجويز ڏيڻ لاءِ استعمال ڪيو ويندو آهي