گوگل دنيا جو سڀ کان مشهور انٽرنيٽ سرچ انجڻ آهي، جنهن تي هر سيڪنڊ 99 هزار کان وڌيڪ ۽ سڄي ڏينهن دوران لڳ ڀڳ 9 ارب سرچون ڪيون وڃن ٿيون. پر فيفا ورلڊ ڪپ 2026 جي هڪ ميچ دوران گوگل جي تاريخ جا سڀئي سرچ رڪارڊ ٽٽي ويا. ڪمپني موجب ارجنٽينا ۽ مصر وچ ۾ رائونڊ آف 16 جي ميچ گوگل سرچ جي تاريخ جو سڀ کان وڌيڪ ٽرئفڪ وارو ڏينهن ثابت ٿيو. گوگل جي نالج اينڊ انفارميشن شعبي جي سربراهه نِڪ فوڪس موجب 7 جولاءِ (پاڪستاني وقت موجب 8 جولاءِ) تي ميچ دوران ارجنٽينا جي فيصلائتي گول کانپوءِ گذريل 28 سالن دوران سڀ کان وڌيڪ سرچ ٽرئفڪ رڪارڊ ڪئي وئي. ڪمپني جي ترجمان انگ اکر جاري نه ڪيا، پر سندس چوڻ هو ته فيصلائتي گول کانپوءِ في سيڪنڊ رڪارڊ تعداد ۾ سرچون ٿيون. ان موقعي تي ائين لڳي رهيو هو ڄڻ سڄي دنيا انٽرنيٽ تي هڪ ئي شيءِ سرچ ڪري رهي هجي. واضح رهي ته فٽبال ورلڊ ڪپ 2026 جو ٽائيٽل اسپين کٽيو، جنهن فائنل ۾ دفاعي چيمپيئن ارجنٽينا کي هڪ صفر تان شڪست ڏئي 16 سالن کانپوءِ ٻيهر عالمي چيمپيئن بڻجڻ جو اعزاز حاصل ڪيو.