احسن خان شوبز انڊسٽري ۾ وڌندڙ عمر سان لاڳاپيل دٻاءُ بابت ڳالهائيندي اداڪارن کي صلاح ڏني آهي ته هو پنهنجي عمر کي قبول ڪن ۽ زندگي جي هر مرحلي کي اعتماد سان گذارين۔
احسن خان، جيڪي پنهنجي بهترين اداڪاري ۽ مختلف ڪردارن سبب مداحن ۾ تمام گهڻو مشهور آهن، تازو هڪ انٽرويو ۾ زندگي، عمر ۽ شوبز جي بدلجندڙ رجحانن بابت تفصيلي ڳالهه ڪئي۔
اداڪار چيو ته زندگي جو هر دور پنهنجي الڳ خوبصورتي ۽ اهميت رکي ٿو، تنهنڪري انسان کي هر عمر کي خوش دلي سان قبول ڪرڻ گهرجي۔ سندس چوڻ مطابق هر مرحلو نيون شيون سکڻ ۽ پاڻ کي بهتر بڻائڻ جا موقعا ڏئي ٿو۔
احسن خان وڌيڪ چيو ته ميڊيا ۾ اڪثر هڪ خاص عمر کي ئي ڪاميابي يا خوبصورتي جي علامت طور پيش ڪيو ويندو آهي، خاص ڪري جواني کي، پر هو ان سوچ سان متفق ناهي۔
هن جو چوڻ هو ته انسان کي پنهنجي عمر تي فخر ڪرڻ گهرجي، ڇو ته صحتمند رهڻ ۽ مسلسل ڪم ڪرڻ پاڻ ۾ هڪ وڏي نعمت آهي۔
اداڪار اهو به چيو ته هن کي ذاتي طور عمر جي حوالي سان وڏيون مشڪلاتون پيش نه آيون آهن، پر هو سمجهي ٿو ته ڪجهه اداڪار شايد هن دٻاءُ کي محسوس ڪندا هوندا۔
احسن خان زور ڏيندي چيو ته اداڪار لاءِ صرف عمر اهم ناهي، پر اصل اهميت اداڪاري، ٽيلنٽ، مقبوليت ۽ ناظرين ۾ پسنديدگي کي آهي۔
هن مطابق ماڻهو سٺن فنڪارن کي هر عمر ۾ ڏسڻ پسند ڪندا آهن، تنهنڪري فنڪارن کي گهرجي ته هو پنهنجي زندگي جي هر مرحلي مان لطف وٺن، پاڻ کي فِٽ رکن ۽ پنهنجي بهترين شخصيت دنيا آڏو پيش ڪن۔
