پاڪستان هاڪي ٽيم جي ڪپتان ابوبڪر جو چوڻ آهي ته پرو ليگ ۾ ڀارت خلاف ٻه ميچون کيڏي چڪا آهيون، اميد آهي ته هن ڀيري پنهنجين غلطين مان سکي بهتر نتيجو حاصل ڪنداسين
پاڪستان هاڪي ٽيم 19 آگسٽ تي ويگنر هاڪي اسٽيڊيم، ايمسٽلوين ۾ ڀارت خلاف اهم ميچ کيڏي رهي آهي. پاڪستان ۽ ڀارت ورلڊ ڪپ 2026 جي پول ڊي ۾ شامل آهن.
پاڪستان هاڪي ٽيم جي اسٽرائڪر رانا وحيد جو چوڻ آهي ته هر لحاظ کان اسان سمجهون ٿا ته هي هڪ اهم مقابلو آهي. اها ڳالهه درست آهي ته اسان کي ويلز خلاف ميچ کٽڻ گهرجي ها، پر ائين نه ٿي سگهيو. البت ڀارت خلاف اسان کٽي سگهون ٿا.
قومي هاڪي ٽيم جي ڪوچ باب جان ويلڊف جيو نيوز سان ڳالهائيندي چيو ته ڀارت هڪ سٺي ٽيم آهي ۽ اسان ڀرپور مقابلي لاءِ تيار آهيون. جيڪڏهن اسان ورلڊ ڪپ ۾ ڀارت کي شڪست ڏئي ايندڙ مرحلي تائين پهچي وياسين ته يقيناً اها تمام وڏي فتح هوندي.
هن چيو ته حقيقت ۾ اسان جو فوڪس جاپان ۾ ٿيندڙ ايشيائي گيمز تي آهي، پر ورلڊ ڪپ ۾ ڀارت کي شڪست ڏيڻ تمام وڏو سرپرائز هوندو. ان لاءِ اسان منصوبابندي ڪري رهيا آهيون، البته اهو نٿو ٻڌائي سگهان ته اسان ڇا سوچي رهيا آهيون. ها، اسان کي اندازو آهي ته ڀارت جون ڪمزوريون ڪهڙيون آهن، جن تي ميچ دوران ڌيان ڏيڻ چاهيون ٿا.
قومي هاڪي ٽيم جي اسسٽنٽ ڪوچ عدنان ذاڪر چيو ته ڀارت جي ڪوچنگ اسٽاف ۾ 14 ماڻهو آهن ۽ هنن پنهنجي هاڪي تي وڏي سيڙپڪاري ڪئي آهي، اسان کي اڃا وقت گهربل هوندو. البت ڀارت خلاف ميچ ففٽي ففٽي هوندي. اسان وٽ وڃائڻ لاءِ ڪجهه به ناهي، جڏهن ته دٻاءُ ڀارتي ٽيم تي هوندو.
