پاڪستاني نوجوان ٽريول ولاگر ۽ ڪوهنورد اسما مشتاق اسپانٽڪ چوٽي جي مهم دوران فوت ٿي وئي. 7 فيبروري 1992ع تي پيدا ٿيل اسما مشتاق کي مهم جوئي، جبلن ۽ قدرتي نظارن سان گهري محبت سبب ڪوهنورداري جي ڪميونٽي ۾ سڃاتو ويندو هو. اسما تازو ئي پاڪستان جي قراقرم جبلن ۾ واقع 7 هزار 27 ميٽر بلند اسپانٽڪ چوٽي سر ڪرڻ واري مهم جو حصو بڻجي هئي. رپورٽن موجب اسما پنهنجي گائيڊ علي اڪبر سان گڏ ڪاميابي سان اسپانٽڪ جي چوٽي سر ڪئي ۽ ان وقت سندس صحت بهتر هئي. تنهن هوندي به چوٽي تان واپسي دوران کيس مبينا طور تي بلند مقام جي بيماري (هاءِ آلٽي ٽيوڊ سڪنِس) ٿي، گائيڊ کيس شروعاتي طبي امداد فراهم ڪئي، پر هوءَ جانبر نه ٿي سگهي. اسما مشتاق جي مڙهه جي واپسي لاءِ قراقرم ڪالنگ ٽريڪس لاڳاپيل اختيارين سان رابطي ۾ آهي ۽ سهڪار ڪري رهيو آهي. اسما جي فوت ٿيڻ جي خبر سامهون اچڻ کانپوءِ سوشل ميڊيا صارفين ڏک ۽ افسوس جو اظهار ڪندي سندس خاندان سان تعزيت ڪئي ۽ مرحومه لاءِ مغفرت ۽ بلند درجات جون دعائون ڪيون.