پشاور زلمي پاڪستان سُپر ليگ جي 11 هين ايڊيشن ۾ 2025 جي هڪ غير معمولي مهم کانپوءِ داخل ٿي رهي آهي، جيڪا گروپ اسٽيج تي ختم ٿي وئي هئي.

اهو پهريون ڀيرو هو جو، جو پي ايس ايل جي تاريخ جي سڀ کان وڌيڪ مستقل ٽيمن مان هڪ سمجهي ويندڙ پشاور زلمي پلي آف تائين نه پهتي.

پشاور زلمي پاڪستان سپر ليگ گذريل سمورن 9 ايڊيشنز ۾ پلي آف ۾ پهتي هئي ۽ 2017 (چيمپئن)، 2018 ۽ 2019 ۾ لڳاتار ٽي فائنل کيڏيا هئا.

جيتوڻيڪ ٽيم گذريل سيزن جي ڀيٽ ۾ اسڪواڊ ۾ ڪيئي تبديليون ڪيون آهن، پر ڪپتاني اڃا تائين بابر اعظم وٽ آهي، جنهن کي 70 ملين پاڪستاني رپين ۾ برقرار رکيو ويو ۽ هو 2023 کان ٽيم جي قيادت ڪري رهيو آهي.

طاقت

ٽيم جو آل رائونڊرز جو جوڙ جنهن ۾ ايرون هارڊي، مائيڪل بريسويل، افتخار احمد ۽ عامر جمال شامل آهن، پليئنگ اليون کي متوازن بڻائڻ ۾ اهم ڪردار ادا ڪندو.

لاهور جي هاءِ اسڪورنگ پچن تي هارڊي ۽ جمال کي کيڏائي سگهجي ٿو، جڏهن ته ڪراچي جي اسپن فرينڊلي ڪنڊيشن ۾ بريسويل ۽ افتخار کي استعمال ڪري سگهجي ٿو.

پشاور زلمي ٽيم وٽ نوجوان باصلاحيت ملڪي رانديگر پڻ موجود آهن، جيڪي علائقائي ۽ انڊر-19 سطح تي شاندار ڪارڪردگي جو مظاهرو ڪري چڪا آهن.

عبدال سبحان ۽ علي رضا انڊر-19 ورلڊ ڪپ ۾ سڀني کي متاثر ڪيو، جڏهن ته فرحان يوسف نيشنل ٽي ٽوئنٽي ڪپ ۾ بهترين اسڪور ڪيا.

ان کانسواءِ عبدال صمد ۽ صوفيان مقيم به اسڪواڊ جو حصو آهن.

ڪمزوريون

زلمي جي بيٽنگ گهڻو ڪري بابر اعظم جي چوڌاري ڦري رهي آهي، جيڪو اينڪر جو ڪردار ادا ڪري ٿو، پر 2025ع ۾ هن رڳو 288 رنسون ٺاهيون، جيڪا سندس بدترين سيزن مان هڪ هئي.

ٽي ٽوئنٽي ورلڊ ڪپ ۾ به بابر جي ڪارڪردگي معمولي رهي ۽ کيس آخري ميچ ۾ اسڪواڊ مان ڊراپ پڻ ڪيو ويو، تنهنڪري سندس فارم تي سڀني جون نظرون کتل هونديون.

ٽيم کي فاسٽ بالنگ پلان ۾ به ڦيرفار ڪرڻي پوندي، ڇو ته بنگلاديشي رانديگر تنزيد حسن، ناهيڊ رانا ۽ شريف الاسلام 17 اپريل کان نيوزيلينڊ خلاف سيريز سبب ٽورنامينٽ اڌ ۾ ڇڏي سگهن ٿا.