گوگل، جيڪو سرچ انجن، اي ميل ۽ ميپس جهڙين انٽرنيٽ سروسز لاءِ مشهور آهي، هاڻي هڪ نئين ۽ حيرت انگيز منصوبي تي ڪم ڪري رهيو آهي جنهن جو مقصد نقصانڪار حشرات جي اثر کي گهٽائڻ آهي. رپورٽن موجب گوگل آمريڪي حڪومت کان درخواست ڪئي آهي ته کيس ڪيليفورنيا ۽ فلوريڊا ۾ 3 ڪروڙ 20 لک مڇر ڇڏڻ جي اجازت ڏني وڃي.

هي منصوبو گوگل جي “ڊي بگ پروگرام” جو حصو آهي، جنهن تحت جراثيم کان پاڪ نر مڇرن کي تيار ڪيو ويو آهي ته جيئن انهن جي ذريعي بيمارين جهڙوڪ ڊينگي، زيڪا ۽ مليريا جي پکيڙ کي گهٽائي سگهجي. ماهرن موجب نر مڇر انسانن جو رت نٿا چوسين ۽ نه ئي بيماريون پکيڙين ٿا، تنهنڪري انهن کي ماحول ۾ ڇڏڻ سان مڇرن جي آبادي ڪنٽرول ڪرڻ ۾ مدد ملي سگهي ٿي.

رپورٽن مطابق آمريڪي ماحولياتي تحفظ واري اداري (EPA) هن منصوبي تي غور ڪري رهي آهي، جڏهن ته گوگل جو چوڻ آهي ته روايتي طريقا جهڙوڪ ڪيميڪل اسپري وقت سان گهٽ اثرائتا ثابت ٿيا آهن. گوگل اڳ ۾ به سنگاپور ۾ اهڙو تجربو ڪري چڪو آهي، جتي مڇرن جي آبادي ۾ نمايان گهٽتائي ڏٺي وئي هئي.