ڀارت ۾ پارڪ جي سير لاءِ آيل 5 ورهين جي نينگري ٽوائي ٽرين جي زد ۾ اچي فوت ٿي وئي. ڀارتي ميڊيا موجب جودھپور جي مشهور مندور گارڊن ۾ هڪ فيملي سير لاءِ آئي هئي، جتي فيملي پارڪ ۾ موجود ٽوائي ٽرين جا مزا وٺي رهي هئي ته اوچتو اهو افسوسناڪ حادثو پيش آيو.

5 ورهين جي بچي عنایرا (Anayra) جي والد محمد حبيب ٻڌايو ته اسان پنهنجي فيملي سان ٽوائي ٽرين ۾ سوار هئاسين ته اوچتو ٽرين ڊرائيور بريڪ لڳائي، جنهن سبب عنایرا ٽرين مان هيٺ ڪري پئي.

بچي جي والد چيو ته مسافرن فوري طور الارم وڄايو ۽ آپريٽر کي ٽرين روڪڻ لاءِ چيو، پر ٽرين نه روڪي وئي. والد موجب ٽرين مڪمل طور بند ٿيڻ کان اڳ ئي ان جو هڪ ڦيٿو عنایرا جي ڳچيءَ مٿان گذري چڪو هو. ان دوران 20 ورهين جي سندس ڀيڻ مسکان به نينگري کي بچائڻ جي ڪوشش ۾ زخمي ٿي پئي.

ميڊيا رپورٽن موجب ٻارڙي جي والد ٽرين آپريٽر جي غفلت خلاف پوليس ۾ شڪايت داخل ڪرائي آهي.