موسميات کاتي موجب سڀاڻي تائين سنڌ جي اڪثر ضلعن ۾ وچولي کان شديد گرمي جي لهر برقرار رهڻ جو امڪان آهي، جڏهن ته صوبي جي ڪجهه ضلعن ۾ ڪن هنڌن تي تيز هوائن ۽ گجگوڙ سان هلڪي کان وچولي برسات پوڻ جو امڪان به ظاهر ڪيو ويو آهي۔

انهيءَ صورتحال جي اثر هيٺ قمبر شهدادڪوٽ، جيڪب آباد، دادو، شهيد بينظير آباد ۽ نوشهروفيروز ضلعن ۾ گرمي پد 47 کان 50 ڊگري سينٽي گريڊ تائين وڌي سگهي ٿو۔

جڏهن ته ٿرپارڪر، بدين، حيدرآباد، مٽياري، ٽنڊو محمد خان، عمرڪوٽ، ميرپورخاص، ڄامشورو ۽ سانگهڙ ضلعن ۾ وڌ ۾ وڌ گرمي پد 44 کان 47 ڊگري سينٽي گريڊ تائين پهچڻ جو امڪان آهي۔

شديد گرمي ۽ ملڪ جي اترين علائقن ۾ اولهه وارين هوائن سبب پهرين جون تي قمبر شهدادڪوٽ، دادو، ميرپورخاص ۽ ٿرپارڪر ضلعن جي ڪجهه علائقن ۾ تيز هوائن ۽ گجگوڙ سان هلڪي کان وچولي برسات پوڻ جو امڪان آهي۔

ڪراچي ۾ ايندڙ ٽن ڏينهن دوران موسم گرم ۽ آلو رهڻ جو امڪان آهي، جتي وڌ ۾ وڌ گرمي پد 35 کان 37 ڊگري سينٽي گريڊ جي وچ ۾ رڪارڊ ٿي سگهي ٿو۔

صبح جو نمي جو تناسب 80 سيڪڙو ۽ شام جو 70 سيڪڙو تائين رهڻ جو امڪان آهي۔ موسميات کاتي موجب ايندڙ ڪجهه ڏينهن دوران سمنڊ مان ايندڙ ڏکڻ اولهه واريون هوائون مڪمل طور سرگرم رهي سگهن ٿيون۔