سنڌ جي مختلف ضلعن ۾ اڄ ۽ سڀاڻي آندھي ۽ گجگوڙ سان گڏ هلڪي کان وچولي برسات جو امڪان ظاهر ڪيو ويو آهي. موسميات کاتي جي اڳڪٿي موجب اڄ سکر، ڪنڌڪوٽ، لاڙڪاڻو، شڪارپور، قمبر شهدادڪوٽ، دادو، خيرپور، نوشهروفيروز، سانگهڙ، ميرپورخاص ۽ عمرڪوٽ ضلعن ۾ ڪٿي ڪٿي آندھي ۽ گجگوڙ سان برسات پئجي سگهي ٿي. جڏهن ته جامشورو، گھوٽڪي، خيرپور، سانگهڙ، عمرڪوٽ ۽ ٿرپارڪر ۾ سڀاڻي به ڪٿي ڪٿي هلڪي برسات جو امڪان آهي.

ٻئي طرف ڪراچي ۾ ايندڙ 3 ڏينهن دوران موسم ابر آلود، گرم ۽ گهڻو نمي وارو رهڻ جو امڪان آهي، جتي وڌ ۾ وڌ گرمي پد 35 کان 37 ڊگري سينٽي گريڊ تائين رڪارڊ ٿي سگهي ٿو. صوبي جي اڪثر علائقن ۾ موسم گرم، سخت گرم ۽ خشڪ رهڻ جي اڳڪٿي ڪئي وئي آهي.