سعودي عرب ۾ حج 2026 لاءِ دنيا جي مختلف ملڪن مان ايندڙ حاجين جو انگ 15 لک 18 هزار کان وڌي ويو آهي۔

سعودي وزارت حج و عمره موجب مختلف ملڪن مان حاجين جي آمد تيزي سان جاري آهي، جڏهن ته مڪه مڪرمه، مدينه منوره ۽ مشاعر مقدسه ۾ انتظامن کي آخري شڪل ڏني پئي وڃي۔

حڪام جو چوڻ آهي ته هن سال جديد ٽيڪنالاجي، ڊجيٽل نگراني، طبي سهولتن ۽ ٽرانسپورٽ نظام کي وڌيڪ بهتر بڻايو ويو آهي ته جيئن حاجين کي وڌ کان وڌ سهولت ملي سگهي۔ سعودي سول ڊفينس، هلالِ احمر ۽ سيڪيورٽي ادارا پڻ هنگامي حالتن کي منهن ڏيڻ لاءِ هاءِ الرٽ تي آهن۔

ٻئي طرف سعودي وزارت داخله غير قانوني حج ۽ بغير اجازت نامي جي مڪي ۾ داخل ٿيندڙ ماڻهن خلاف سخت ڪارروائي جو اعلان ڪيو آهي۔ اختيارين موجب حج انتظامن کي محفوظ ۽ منظم رکڻ لاءِ سخت نگراني جاري رهندي۔

هوڏانهن دنيا جي مختلف ملڪن مان آيل وڏي انگ ۾ حاجي مسجد الحرام ۽ مسجد نبوی ۾ عبادتن ۽ حج جي تيارين ۾ مصروف آهن، جڏهن ته ايندڙ ڏينهن ۾ وڌيڪ لکين زائرين جي آمد متوقع آهي۔