پاڪستان پاران آمريڪا ۽ ايران وچ ۾ وڌندڙ ڇڪتاڻ گهٽائڻ لاءِ سفارتي ڪوششون جاري آهن، ۽ انهيءَ سلسلي ۾ چيف آف ڊفينس فورسز عاصم منير ۽ گهرو وزير محسن نقوی ايران ۾ موجود آهن۔
ايراني اختيارين موجب، فيلڊ مارشل عاصم منير تهران ۾ ايراني پرڏيهي وزير عباس عراقچی سان ملاقات ڪئي، جنهن دوران خطي ۾ ڇڪتاڻ گهٽائڻ، امن، استحڪام ۽ اولهه ايشيا جي سيڪيورٽي بابت سفارتي ڪوششن تي ڳالهيون ڪيون ويون۔
واضح رهي ته فيلڊ مارشل عاصم منير گذريل ڏينهن ايران جي دوري تي پهتا هئا، جتي ايراني گهرو وزير اسکندر مومنی سندن گرمجوشي سان آڌرڀاءُ ڪيو۔
ٻئي طرف گهرو وزير محسن نقوي اڳ ئي ايران ۾ موجود آهن، جتي هنن ڪيترين اهم ايراني شخصيتن سان ملاقاتون ڪري آمريڪا سان جاري تڪرارن ۾ گهٽتائي آڻڻ بابت قدمن تي خيال ونڊيو۔
