ڪوالالمپور: ملائيشيا 16 سالن کان گهٽ عمر ٻارن لاءِ سوشل ميڊيا اڪائونٽس جي نئين رجسٽريشن تي پابندي لاڳو ڪري ڇڏي آهي. هي قدم ٻارن کي نقصانڪار آن لائن مواد ۽ سوشل ميڊيا جي منفي اثرن کان بچائڻ لاءِ کنيو ويو آهي.

Malaysia Communications and Multimedia Commission موجب نون ضابطن تي عملدرآمد سومر کان شروع ٿي ويو آهي، جنهن تحت سوشل ميڊيا پليٽفارمز کي نون استعمال ڪندڙن جي عمر جي تصديق سرڪاري رڪارڊ ذريعي ڪرڻي پوندي.

نئون قانون Facebook، Instagram، TikTok ۽ YouTube سميت ٻين مشهور پليٽفارمز تي لاڳو ٿيندو. جيڪڏهن ڪنهن ڪمپني انهن ضابطن تي عمل نه ڪيو ته ان تي هڪ ڪروڙ رنگٽ (تقريباً 25 لک آمريڪي ڊالر) تائين جرمانو لڳائي سگهجي ٿو.

حڪومت جو چوڻ آهي ته هن قدم جو مقصد ٻارن کي انٽرنيٽ کان پري رکڻ نه پر سوشل ميڊيا ڪمپنين، والدين ۽ سرپرستن جي ذميوارين کي وڌيڪ مؤثر بڻائڻ آهي ته جيئن گهٽ عمر وارن کي محفوظ آن لائن ماحول ملي سگهي.

اختيارين موجب موجوده صارفين جي عمر جي تصديق جو عمل به شروع ڪيو ويندو، جنهن لاءِ سوشل ميڊيا ڪمپنين کي ڇهن مهينن جو وقت ڏنو ويو آهي.

حڪومت خاص طور تي اهڙي مواد خلاف قدم کڻي رهي آهي جيڪو نسلي يا مذهبي تڪرار کي وڌائي يا ملڪ جي ادارن ۽ بادشاهت خلاف اشتعال پيدا ڪري.

ملائيشيا هاڻي انهن ملڪن ۾ شامل ٿي ويو آهي جيڪي ٻارن جي آن لائن حفاظت لاءِ سخت قانون لاڳو ڪري رهيا آهن.