ڪراچي جي حب ريور روڊ تي 3 ڏينهن اڳ ميان زال کي ڪچلڻ بعد فرار ٿيندڙ ڊمپر ڊرائيور کي گرفتار ڪري ورتو ويو آهي. 30 مئي تي موچڪو ٿاڻي جي حد ۾ تيز رفتار ڊمپر موٽرسائيڪل تي سوار ميان زال کي ٽڪر هڻي فرار ٿي ويو هو، جنهن جي نتيجي ۾ عرفان نالي شخص موقعي تي ئي فوت ٿي ويو، جڏهن ته سندس زال شڪيلا جون ٻئي ٽنگون سخت زخمي ٿي پيون هيون.

ڊي آءِ جي سائوٿ اسد رضا موجب جاچ ٽيم ٽيڪنيڪل بنيادن تي ڪارروائي ڪندي ڊمپر ڊرائيور کي گرفتار ڪيو، جنهن جي سڃاڻپ نذر محمد طور ٿي آهي. پوليس موجب گرفتار ملزم خلاف قانوني ڪارروائي جاري آهي.