تهران: ايران آمريڪي صدر ڊونلڊ ٽرمپ جي ان دعويٰ کي رد ڪري ڇڏيو آهي، جنهن ۾ هن چيو هو ته ايران هڪ آمريڪي خاتون قيدي کي آزاد ڪيو آهي.

ايراني سرڪاري خبر رساں اداري موجب ايران جي عدليه واضح ڪيو آهي ته ڪنهن به آمريڪي قيدي کي نه آزاد ڪيو ويو آهي ۽ نه ئي ڪنهن سان قيدين جي مٽاسٽا ڪئي وئي آهي.

عدليه جي ذريعن موجب، ٽرمپ جي بيان جي ابتڙ، ايران جي جيلن مان ڪنهن به آمريڪي قيدي يا مبينا جاسوس کي آزاد ڪرڻ يا ڪنهن سان مٽاسٽا ڪرڻ وارو ڪو به واقعو پيش نه آيو آهي.

واضح رهي ته ڊونلڊ ٽرمپ پنهنجي سوشل ميڊيا پليٽفارم تي دعويٰ ڪئي هئي ته ايران بائيڊن حڪومت جي دور ۾، سال 2024ع دوران گرفتار ٿيل هڪ آمريڪي خاتون کي آزاد ڪري ڇڏيو آهي. ٽرمپ اهو به چيو هو ته آمريڪا ايران جي هن قدم کي خيرسگالي جي علامت طور ڏسي ٿو.

پر ايراني عدليه جي ذريعن جو چوڻ آهي ته جاچ دوران اهڙو ڪو به آمريڪي قيدي يا مبينا جاسوس سامهون نه آيو، جيڪو ٽرمپ جي بيان يا ان سان لاڳاپيل ڪنهن به تفصيل سان مطابقت رکي.

ايراني اختيارين هڪ ڀيرو ٻيهر زور ڏنو آهي ته ٽرمپ جو بيان حقيقتن تي ٻڌل ناهي ۽ ايران جي جيلن مان ڪنهن به آمريڪي شهري کي آزاد يا مٽاسٽا نه ڪيو ويو آهي.