ايران جي پاسدارانِ انقلاب اردن جي عوام جي نالي جاري ڪيل بيان ۾ چيو آهي ته اردن جا شهري پنهنجي سرزمين تان آمريڪي فوجي اڏن جي خاتمي جو مطالبو ڪن.

بيان موجب، ايران اڄ اردن ۾ موجود ان آمريڪي هوائي اڏي کي نشانو بڻايو، جتان ايران خلاف حملا ڪيا ويا هئا. پاسدارانِ انقلاب دعويٰ ڪئي ته آمريڪي جارحيت جي شروعاتي ڏينهن انهن اڏن تان ٿيندڙ حملن ۾ ميناب ۾ 186 ٻار ۽ استاد شهيد ٿيا هئا.

بيان ۾ وڌيڪ چيو ويو آهي ته ايران آمريڪي فوجي ڪاررواين جو جواب ڏنو آهي ۽ ايران کي نه اردن سان ۽ نه ئي اردن جي عوام سان ڪا دشمني آهي، بلڪه اردني عوام جو احترام ڪيو وڃي ٿو.

پاسدارانِ انقلاب موجب، اردن جا ماڻهو فلسطينين جي ڏک ۽ انهن سان ٿيندڙ ناانصافين کي ٻين قومن جي ڀيٽ ۾ وڌيڪ سمجهن ٿا. بيان ۾ دعويٰ ڪئي وئي ته اسرائيلي رياست غزه ۾ 20 هزار ٻارن سميت 70 هزار فلسطينين کي قتل ڪيو، جنهن ۾ آمريڪا جي سڌي مداخلت جو به ذڪر ڪيو ويو.

بيان جي آخر ۾ اردن جي عوام کي اپيل ڪئي وئي ته هو آمريڪي فوجي اڏن جي خاتمي لاءِ آواز بلند ڪن. پاسدارانِ انقلاب جو چوڻ آهي ته اهڙي مطالبي سان فلسطينين جي مدد ۽ خطي ۾ امن جي بحالي ممڪن ٿي سگهي ٿي، جڏهن ته اردن جي سلامتي ۽ خوشحالي لاءِ نيڪ خواهشن جو به اظهار ڪيو ويو.