واشنگٽن مان آمريڪي اخبار دعويٰ ڪئي آهي ته آمريڪي صدر ڊونلڊ ٽرمپ ايران ۾ زميني فوج موڪلڻ جي امڪان تي غور شروع ڪري ڇڏيو آهي. اخبار موجب آمريڪي عملدارن جي حوالي سان ٻڌايو ويو آهي ته صدر ٽرمپ آبنائي هرمز جي ويجهو واقع ايراني ٻيٽن تي زميني فوج لاهي قبضو ڪرڻ جي آپشن جو جائزو وٺي رهيو آهي. ڊونلڊ ٽرمپ چيو آهي ته ايران کي جلد شڪست ڏني ويندي، ايران ڳالهين جو خواهشمند آهي ۽ معاملو حل ڪرڻ چاهي ٿو، جڏهن ته آمريڪا مناسب وقت تي فيصلو ڪندو ته ڪو معاهدو ڪرڻو آهي يا نه. ٽرمپ وڌيڪ چيو ته ايران بائيڊن حڪومت دوران گرفتار ڪيل هڪ آمريڪي عورت کي آزاد ڪيو آهي، جنهن کي هو خيرسگالي جو قدم قرار ڏين ٿا. ايراني پلن تي حملن جي ڊيڊ لائين بابت سوال تي ٽرمپ چيو ته کيس اهڙيون ڊيڊ لائينون ڏيڻ پسند ناهي، جڏهن ته ايران کي پنهنجو رويو بهتر بڻائڻ گهرجي. واضح رهي ته آمريڪي فوج ايران تي هڪ ڀيرو ٻيهر حملا ڪيا آهن. آمريڪي سينٽرل ڪمانڊ موجب انهن حملن جو هدف آبنائي هرمز مان گذرندڙ جهازن لاءِ خطرو بڻجندڙ ايراني فوجي صلاحيتون هيون. ايراني ميڊيا موجب سيريڪ، اهواز، چابهار ۽ بندر عباس ۾ ڌماڪا ٿيا آهن، جڏهن ته تازن آمريڪي حملن ۾ 7 ايراني فوجي ۽ 30 شهري مارجي وڃڻ جون رپورٽون سامهون آيون آهن
