ڀارت جي سڀ کان وڏي ايٽمي پاور پلانٽ ڪڊنڪولم سان لاڳاپيل وڏي مقدار ۾ حساس ڊيٽا ڊارڪ ويب تي ليڪ ٿي وئي آهي. پرڏيهي خبر رساں اداري رائٽرز موجب، رينسم ويئر گروپ ورلڊ ليڪس دعويٰ ڪئي آهي ته هن ريلائنس گروپ مان حاصل ڪيل ڊيٽا شايع ڪئي آهي، جنهن ۾ تنصيبات جي ڪجهه حصن جا نقشا، سپلائرز جون تفصيلون، گڏجاڻين ۽ معائنن جو رڪارڊ، سامان جي جائزي ۽ انشورنس پاليسين سميت اهم معلومات شامل آهي.
رپورٽ موجب ڪڊنڪولم ايٽمي پاور پلانٽ ڀارتي رياست تامل ناڊو ۾ واقع آهي ۽ ملڪ جي ستن ايٽمي پاور پلانٽن مان سڀ کان وڏو آهي. پلانٽ جي يونٽ 3 ۽ يونٽ 4 جي انفراسٽرڪچر جي تعمير جو ٺيڪو ريلائنس انفراسٽرڪچر وٽ آهي، جيڪي اڃا تعمير هيٺ آهن ۽ 2027ع تائين فعال ٿيڻ جي اميد آهي.
ريلائنس گروپ بيان جاري ڪندي چيو آهي ته ڊيٽا سينٽر سروس فراهم ڪندڙ يوٽا جي سرور ۾ جزوي دراندازي ٿي آهي ۽ واقعي بابت حڪومت کي آگاهه ڪيو ويو آهي، جڏهن ته متاثر ٿيل ڊيٽا بابت تفصيل جاري نه ڪيا ويا آهن.
ماهرن خبردار ڪيو آهي ته جيڪڏهن اهڙو حساس ڊيٽا غلط هٿن ۾ وڃي ٿو ته ان سان پلانٽ جي معاون نظامن، سپلائرز ۽ سيڪيورٽي جي ممڪن ڪمزورين بابت اهم ڄاڻ حاصل ڪري سگهجي ٿي، جيڪا قومي سلامتي لاءِ خطرو بڻجي سگهي ٿي.
