برطانيا ۾ 16 سالن کان گهٽ عمر وارن ٻارن کي انرجي ڊرنڪس وڪرو ڪرڻ تي پابندي لاڳو ڪرڻ تي غور ڪيو پيو وڃي، جيڪا ايندڙ سال اپريل کان لاڳو ٿي سگهي ٿي.

پرڏيهي ميڊيا رپورٽن موجب جيڪڏهن نوان ضابطا لاڳو ٿيا ته في ليٽر 150 ملي گرام يا ان کان وڌيڪ ڪيفين وارا انرجي ڊرنڪس 16 سالن کان گهٽ عمر جي ٻارن کي دڪانن، آن لائن پليٽفارمن، ريسٽورنٽن ۽ ڪيفيز تي وڪرو ڪرڻ غير قانوني قرار ڏنو ويندو.

رپورٽن ۾ وڌيڪ ٻڌايو ويو آهي ته 16 سالن کان گهٽ عمر جا ٻار وينڊنگ مشينن مان به انرجي ڊرنڪس خريد نه ڪري سگهندا.

برطانوي اختيارين جو چوڻ آهي ته هن قدم جو مقصد ٻارن جي صحت جو تحفظ ۽ ڪيفين جي وڌندڙ استعمال کي روڪڻ آهي.

واضح رهي ته برطانيا ان کان اڳ به 16 سالن کان گهٽ عمر وارن ٻارن جي سوشل ميڊيا جي استعمال بابت سخت پابندين ۽ حفاظتي قدمن تي عمل ڪري چڪو آهي.