راولپنڊي: پاڪ فوج جي شعبي تعلقاتِ عامه (آءِ ايس پي آر) موجب سيڪيورٽي فورسز بنون ۽ ڀرپاسي وارن علائقن ۾ گذريل 24 ڪلاڪن دوران مختلف ڪاررواين ۽ فائرنگ جي ڏي وٺ ۾ 24 دهشتگرد مارجڻ جي دعويٰ ڪئي آهي.

آءِ ايس پي آر موجب مارجي ويل دهشتگردن جي قبضي مان هٿيار ۽ گولا بارود پڻ هٿ ڪرڻ جي دعويٰ ڪئي وئي آهي.

فوجي ترجمان موجب اهي دهشتگرد ڪيترين ئي دهشتگرد ڪاررواين ۽ بيگناهه شهرين جي قتل ۾ ملوث هئا.

آءِ ايس پي آر وڌيڪ چيو آهي ته بنون ۾ تازين دهشتگرد حملن ۽ خودڪش ڌماڪي کان پوءِ سيڪيورٽي فورسز جا آپريشن جاري آهن، جڏهن ته دهشتگردن ۽ سندن سهولتڪارن خلاف گڏيل انٽيليجنس بنيادن تي آپريشن پڻ شروع ڪيا ويا آهن.

فوجي ترجمان موجب ملڪ مان دهشتگردي جي خاتمي لاءِ ڪارروايون مڪمل قوت سان جاري رهنديون.