اسلام آباد: استنبول کان اسلام آباد ايندڙ هڪ غير ملڪي ايئرلائن جي پرواز کي آذربائيجان جي فضائي حدن ۾ فني خرابي پيش اچڻ بعد ايمرجنسي قرار ڏئي باڪو ايئرپورٽ تي محفوظ لينڊ ڪرايو ويو.

ايويئيشن ذريعن موجب، پرواز استنبول کان اسلام آباد اچي رهي هئي ته آذربائيجان جي فضائي حدن ۾ جهاز ۾ فني خرابي پيدا ٿي وئي.

فلائيٽ ريڊار 24 موجب جهاز کي گلوبل نيويگيشن سيٽلائيٽ سسٽم (GNSS) جا سگنل ملڻ بند ٿي ويا، جنهن بعد ايئربس اي 330 جي پائلٽ ايمرجنسي پيغام جاري ڪيو.

ذريعن موجب، ايئر ٽريفڪ ڪنٽرول جي هدايتن تي پائلٽ جهاز کي باڪو ايئرپورٽ تي محفوظ طريقي سان لاٿو.

رپورٽن موجب، هي پرواز اسلام آباد ايئرپورٽ تي رات 3 لڳي 35 منٽن تي لهڻ واري هئي، پر ايمرجنسي لينڊنگ سبب دير ٿي وئي. مسافرن کي جهاز مان لاهي ٽرمينل منتقل ڪيو ويو، جڏهن ته جهاز جي فني خرابي دور ڪرڻ لاءِ ڪم شروع ڪيو ويو.

بعد ۾ باڪو ۾ ايمرجنسي لينڊنگ ڪندڙ پرواز جا مسافر لڳ ڀڳ اٺن ڪلاڪن ۽ اڌ جي دير کان پوءِ اسلام آباد پهتا، جڏهن ته استنبول واپس ويندڙ ساڳي پرواز به تقريباً نو ڪلاڪ دير جو شڪار ٿي.