اسلام آباد ۾ پاڪستان ٽيلي ڪميونيڪيشن اٿارٽي (پي ٽي اي) جي چيئرمين انڪشاف ڪيو آهي ته ملڪ ۾ ٽيليڪام ڪمپنين جي لڳ ڀڳ 9 هزار سائيٽن تي چوري جون وارداتون ٿي چڪيون آهن، جنهن سبب سروسز جي فراهمي به متاثر ٿي آهي.

پي ٽي اي چيئرمين موجب حڪومت هدايت ڪندي آهي ته جيڪڏهن ڪنهن شهري موبائل پيڪيج خريد ڪيو هجي ۽ سروس بند هئڻ سبب اهو استعمال نه ڪري سگهي ته اهڙي صورت ۾ صارف کي رقم واپس ڪئي وڃي.

هن وڌيڪ چيو ته سروس جي خراب معيار تي پي ٽي اي ٽيليڪام ڪمپنين تي 4 ارب رپين کان وڌيڪ جرمانا به لاڳو ڪري چڪي آهي، ته جيئن صارفين کي بهتر سهولتون فراهم ڪري سگهجن.

پي ٽي اي چيئرمين واضح ڪيو ته موبائل فون سروسز تي لاڳو ٿيندڙ ٽيڪسن بابت پي ٽي اي جو ڪو به ڪردار ناهي، ڇو ته موبائل ٽيڪس لاڳو ڪرڻ فيڊرل بورڊ آف روينيو (FBR) جي دائري اختيار ۾ اچي ٿو.