اسلام آباد: ايندڙ هفتي لاءِ ملڪ ۾ پيٽروليم شين جي اگهن ۾ وڏي واڌ جو امڪان ظاهر ڪيو ويو آهي.

تفصيلن موجب هاءِ اسپيڊ ڊيزل جي قيمت ۾ لڳ ڀڳ 40 رپيا في ليٽر ۽ پيٽرول جي قيمت ۾ لڳ ڀڳ 10 رپيا في ليٽر واڌ جو امڪان آهي. جڏهن ته حڪومت قيمتن ۾ ٿيندڙ واڌ جو اثر گهٽ ڪرڻ لاءِ پيٽروليم ليوي ۾ گهٽتائي تي غور ڪري رهي آهي.

رپورٽن موجب ايران ۽ آمريڪا وچ ۾ تازي ڇڪتاڻ سبب عالمي مارڪيٽ ۾ خام تيل جي قيمتن ۾ اضافو ٿيو آهي، جنهن جي نتيجي ۾ ايندڙ 15 ڏينهن واري جائزي دوران 18 جولاءِ کان پيٽروليم شين جي اگهن ۾ واڌ متوقع آهي.

ٻئي طرف حڪومت پيٽروليم شين جي ذخيره اندوزي ڪندڙن خلاف سخت ڪارروائي جو حڪم ڏنو آهي.

ان کان علاوه نيشنل ڪميٽي آن مانيٽرنگ اينڊ ڪوآرڊينيشن مارڪيٽ جي ڪجهه عنصرن طرفان پيٽروليم شين جي ذخيره اندوزي جو سخت نوٽيس وٺندي اوگرا کي لاڳاپيل ۽ ضروري قانوني ڪارروائي ڪرڻ جون هدايتون جاري ڪري ڇڏيون آهن.