اسلام آباد: يورپي ملڪن وڃڻ جي ڪوشش دوران ٻيڙين جي حادثن ۾ گذريل چئن ورهين دوران 335 پاڪستاني پنهنجيون حياتيون وڃائي ويٺا. ايف آءِ اي جي دستاويزن موجب، جون 2023 کان هينئر تائين 7 وڏا ۽ جان ليوا ٻيڙي حادثا پيش اچي چڪا آهن. ايتري وڏي جاني نقصان باوجود غيرقانوني طريقن سان يورپ وڃڻ جون ڪوششون جاري آهن، جڏهن ته انساني اسمگلنگ جا نيٽ ورڪ ماڻهن کي اڃا تائين اهڙن خطرناڪ سفرن لاءِ آماده ڪري رهيا آهن.

رپورٽ موجب، ٻيڙين جي حادثن ۾ ٿيندڙ اهي موت ڊنڪي جي خطرناڪ رستن بابت هڪ ڀيرو ٻيهر وڏا سوال اٿاري رهيا آهن. جون 2023 ۾ يونان ويندڙ ٻيڙي حادثي جو شڪار ٿي، جنهن ۾ 226 پاڪستاني سوار هئا، جن مان 207 فوت ٿي ويا، جڏهن ته 19 ڄڻا بچي ويا.

ڊسمبر 2024 ۾ يونان ويندڙ هڪ ٻي ٻيڙي به حادثي جو شڪار ٿي، جنهن ۾ 69 پاڪستاني سوار هئا. ان حادثي ۾ 25 پاڪستاني فوت ٿيا، جڏهن ته 44 ڄڻن کي بچايو ويو.

ايف آءِ اي دستاويزن موجب، جنوري 2025 ۾ مراڪش ڀرسان پيش آيل ٻيڙي حادثي ۾ 70 پاڪستاني سوار هئا، جڏهن ته فيبروري 2025 ۾ ليبيا ڀرسان پيش آيل ٻيڙي حادثي ۾ 40 پاڪستانين جي سڃاڻپ ٿي، جن مان 23 فوت ۽ 13 ڄڻا بچي ويا.

رپورٽ ۾ وڌيڪ ٻڌايو ويو آهي ته 2025 ۽ 2026 دوران ليبيا کان ڊنڪي هڻندي ٻيڙيون ٻڏڻ جا 4 وڏا حادثا پيش آيا. فيبروري، اپريل ۽ آڪٽوبر 2025 ۽ اپريل 2026 ۾ پيش آيل انهن حادثن ۾ 102 پاڪستاني متاثر ٿيا، جن مان 71 فوت جڏهن ته 30 ڄڻا بچي ويا.

ايف آءِ اي موجب، ايتري وڏي جاني نقصان باوجود غيرقانوني طريقي سان يورپ وڃڻ جون ڪوششون نه رڪجي سگهيون آهن، جڏهن ته انساني اسمگلنگ جا منظم نيٽ ورڪ ماڻهن کي اڃا تائين اهڙن خطرناڪ سفرن تي وڃڻ لاءِ آماده ڪري رهيا آهن.