افغانستان جي طالبان حڪومت هرات ۾ عوام تي سختيون وڌيڪ وڌائي ڇڏيون آهن.

آمريڪي اخبار نيويارڪ ٽائمز موجب ملا هيبت الله اخوندزاده جي هدايتن کانپوءِ طالبان پنهنجي سخت قانونن تي عملدرآمد وڌيڪ تيز ڪري ڇڏيو آهي.

رپورٽ موجب هرات ۾ عورتن کي لباس ۽ مردن کي ڏاڙهي جي معاملي تي گرفتار ڪيو پيو وڃي، جڏهن ته خوف سبب ڪيترين ئي عورتن گهرن کان ٻاهر نڪرڻ گهٽائي ڇڏيو آهي.

رڳو ٻن ڏينهن دوران گهٽ ۾ گهٽ 30 عورتن کي لباس بابت قانونن جي مبينا ڀڃڪڙي تي گرفتار ڪيو ويو آهي، جڏهن ته مقامي انساني حقن جي تنظيمن جو چوڻ آهي ته هرات ۾ گرفتار عورتن جو انگ 200 کان به وڌي چڪو آهي.

طالبان حڪومت جي سخت پاليسين جو اثر ڇوڪرين جي تعليم تي پڻ پئجي رهيو آهي، ۽ طالبان جي خوف سبب ڪيترن ئي والدين پنهنجين ڌيئرن کي اسڪول موڪلڻ بند ڪري ڇڏيو آهي.

رپورٽ موجب عاشوري جي موقعي تي طالبان شيعه برادري جي مذهبي رسمن ۽ جلوسن تي به پابنديون لاڳو ڪيون، جڏهن ته افغانستان جي شيعه برادري اڃا تائين سرڪاري نمائندگي کان محروم آهي.