بالي ووڊ جي مشهور اداڪار عامر خان جان کان مارڻ جون ڌمڪيون ملڻ کان پوءِ پنهنجي ٽين زال جي مذهب بابت اهم انڪشاف ڪيو آهي.

ڀارتي ميڊيا موجب مهاراشٽرا جي هڪ وزير نتیش راني، عامر خان جي شادين جي حوالي سان کيس ”لو جهاد“ جو برانڊ ايمبيسيڊر قرار ڏنو. ان بيان کان پوءِ ايودھيا سان واسطو رکندڙ هڪ هندو انتها پسند اڳواڻ جگد گرو پرمهنس آچاريه به ان جي حمايت ڪندي الزام هنيو ته عامر خان جون هندو عورتن سان شاديون ”لو جهاد“ کي هٿي ڏيڻ لاءِ هيون.

رپورٽن موجب ان ئي اڳواڻ عامر خان کي قتل ڪندڙ شخص لاءِ 5 ڪروڙ رپين انعام ڏيڻ جو اعلان پڻ ڪيو ۽ چيو ته جيڪڏهن ڪو اهڙو قدم کڻي ٿو ته سندس قانوني خرچ به برداشت ڪيا ويندا.

جان کان مارڻ جي ڌمڪين کان پوءِ عامر خان هڪ تازي انٽرويو ۾ پنهنجي ٽين زال گوري اسپرٽ بابت ڳالهائيندي چيو ته هوءَ هندو نه، پر هڪ عيسائي عورت آهي.

عامر خان وڌيڪ چيو ته سندس پهرين زال رينا دتہ ۽ ٻي زال ڪرن راؤ به شادي کان پوءِ پنهنجو مذهب تبديل نه ڪيو هو، ۽ نه ئي گوري اسپرٽ ائين ڪيو، ڇاڪاڻ⁠تہ انهن جون شاديون سول ميريجز (Civil Marriages) تحت ٿيون هيون.

اداڪار موجب سندن خاندان هميشه مختلف مذهبن جي ماڻهن سان گڏجي رهڻ ۽ هڪ ٻئي جو احترام ڪرڻ تي يقين رکي ٿو. هن چيو ته سندس ٻنهي ڀينرن جون شاديون هندو مردن سان ٿيون، سندس ڪزن منصور هڪ عيسائي عورت سان شادي ڪئي، جڏهن ته سندس ڌيءَ به هڪ هندو شخص سان شادي ڪئي آهي.

واضح رهي ته عامر خان پنهنجي پهرين زال رينا دتہ سان 1986ع ۾ شادي ڪئي، جيڪا 2002ع ۾ ختم ٿي وئي. ان کان پوءِ 2005ع ۾ ڪرن راؤ سان شادي ڪئي، جيڪا 2021ع ۾ ختم ٿي. بعد ۾ هن گوري اسپرٽ سان ٽين شادي ڪئي.

نوٽ: خبر ۾ شامل الزام ۽ ڌمڪين بابت دعوائون ڀارتي ميڊيا ۽ لاڳاپيل شخصيتن جي بيانن تي ٻڌل آهن، جن جي آزاد ذريعن کان تصديق سامهون ناهي آئي.