پاڪستاني اداڪار احسن خان جي والد رضاءِ الٰهي سان لاڏاڻو ڪري ويا. احسن خان پنهنجي والد جي وفات جي ڏکوئيندڙ خبر انسٽاگرام ذريعي مداحن سان شيئر ڪندي سندن ياد ۾ تصويرون پڻ پوسٽ ڪيون. پنهنجي جذباتي پيغام ۾ هن لکيو ته زندگي جا ڪجهه وڇوڙا انسان کي اها حقيقت ياد ڏيارين ٿا ته هن دنيا ۾ ڪا به شيءِ هميشه رهڻ واري ناهي ۽ هر شيءِ الله پاڪ جي امانت آهي. هن چيو ته سندس والد هڪ بهترين انسان هئا ۽ سندس شخصيت ۽ ڪاميابي ۾ والد جو بنيادي ڪردار رهيو. احسن خان ڏک جي هن گهڙي ۾ ساڻس همدردي، دعائن ۽ محبت جو اظهار ڪندڙ سڀني ماڻهن جا ٿورا مڃيندي چيو ته انهن جي ساٿ کيس اهو احساس ڏياريو ته هو هن آزمائش ۾ اڪيلو نه هو. اداڪار جي والد جي وفات تي مداحن، شوبز شخصيتن ۽ سوشل ميڊيا واهپيدارن پاران گهري ڏک ۽ تعزيت جو اظهار ڪندي مرحوم لاءِ مغفرت جي دعا ڪئي پئي وڃي.