برطانوي حڪومت 16 ۽ 17 ورهين جي نوجوانن لاءِ رات 12 وڳي کان صبح 6 وڳي تائين سوشل ميڊيا تي ڪرفيو لاڳو ڪرڻ جي تجويز پيش ڪئي آهي. هن تجويز تحت سڀئي سوشل ميڊيا پليٽ فارمز رات جي وقت پاڻمرادو بند ٿي ويندا، جڏهن ته صارف جيڪڏهن چاهين ته سيٽنگز تبديل ڪري اها پابندي ختم به ڪري سگهن ٿا. حڪومت آٽو پلي ۽ لاڳيتو اسڪرول جهڙن فيچرن کي به ڊيفالٽ طور بند ڪرڻ چاهي ٿي، جيئن نوجوانن جي ننڊ، تعليم ۽ خانداني زندگي بهتر بڻائي سگهجي. بهرحال، ماهرن ۽ ٻارن جي تحفظ لاءِ ڪم ڪندڙ تنظيمن خدشو ظاهر ڪيو آهي ته اهي پابنديون آساني سان بند ڪري سگهجن ٿيون، تنهنڪري انهن جي اثرائتي محدود ٿي سگهي ٿي. ياد رهي ته گذريل مهيني برطانوي وزيراعظم ڪيئر اسٽارمر 16 سالن کان گهٽ عمر وارن ٻارن لاءِ سوشل ميڊيا تي پابندي لاڳو ڪرڻ جو اعلان ڪيو هو ۽ چيو هو ته اهڙي پابندي ٻارن جي تحفظ لاءِ ضروري قدم آهي.