آئل ڪمپنين ملڪ ۾ پيٽرول جي ممڪن کوٽ بابت خبردار ڪندي حڪومت کان فوري مداخلت جو مطالبو ڪيو آهي. ڪمپنين جو چوڻ آهي ته هن وقت ملڪ ۾ رڳو 15 ڏينهن جي ضرورت جيترو پيٽرول جو ذخيرو باقي بچيو آهي. آئل ڪمپنين حڪومت کي آگاهه ڪيو آهي ته جيڪڏهن فوري قدم نه کنيا ويا ته پيٽرول (موٽر اسپرٽ/ايم ايس) جي فراهمي متاثر ٿي سگهي ٿي. 15 جولاءِ تي توانائي واري وزير (پيٽروليم ڊويزن) علي پرويز ملڪ ڏانهن موڪليل هڪ "انتهائي فوري" خط ۾ آئل ڪمپنين جي ايڊوائزري ڪائونسل (او سي اي سي) چيو آهي ته ملڪ ۾ پيٽرول جي فراهمي جي صورتحال انتهائي ڳڻتي جوڳي بڻجي چڪي آهي. ڪائونسل موجب هن وقت لڳ ڀڳ 3 لک 70 هزار ميٽرڪ ٽن موٽر اسپرٽ (ايم ايس) جو ذخيرو موجود آهي، جيڪو ملڪ جي لڳ ڀڳ 15 ڏينهن جي ضرورت پوري ڪري سگهي ٿو. آئل ڪمپنين جو وڌيڪ چوڻ آهي ته ويبوڪ ۾ دير سبب درآمد ٿيل پيٽرول جي ڪليئرنس متاثر ٿي رهي آهي، جيڪڏهن ٽي درآمدي پيٽرول ڪارگو وقت تي نه پهتا ته سپلائي کي سخت ڌڪ لڳي سگهي ٿو. ان کان علاوه 66.7 ارب رپين جي ادائيگي نه ٿيڻ سبب آئل ڪمپنين کي شديد مالي بحران کي منهن ڏيڻو پئجي رهيو آهي. صنعت سان لاڳاپيل ذريعن موجب گهٽ ذخيرن، درآمدي ايندھن جي ڪسٽمز ڪليئرنس ۾ دير، طلب ۾ واڌ ۽ مالي دٻاءُ سبب پيٽرول جي فراهمي ۾ رڪاوٽون پيدا ٿيڻ جو خدشو آهي.