گوجرانوالا ۾ جمعيت علماءِ اسلام جي سربراهه مولانا فضل الرحمان خلاف فوج بابت ڪيل تقرير تي ڪيس داخل ڪرڻ لاءِ درخواست داخل ڪئي وئي آهي. درخواست ايڊووڪيٽ منظور قادر ڀنڊر طرفان داخل ڪئي وئي، جنهن تي ايڊيشنل سيشن جج فيصل جميل ايس ايڇ او سول لائنز ۽ مولانا فضل الرحمان کي 28 جولاءِ لاءِ نوٽيس جاري ڪندي پوليس کان پڻ رپورٽ طلب ڪري ورتي آهي. درخواست ۾ مولانا فضل الرحمان جي متنازع تقرير تي قانون موجب ڪيس داخل ڪرڻ جي استدعا ڪئي وئي آهي. ٻئي طرف پاڪستان علماءِ ڪائونسل جي چيئرمين علامه طاهر اشرفي سميت مختلف سياسي اڳواڻن پڻ بيان تي ردعمل ڏيندي شهيدن بابت اهڙي بيان جي مذمت ڪئي آهي.