وینزویلا ۾ گذريل هفتي آيل 7.2 ۽ 7.5 شدت وارن طاقتور زلزلن کان پوءِ جاني نقصان بابت ڳڻتي وڌي وئي آهي، ۽ خدشو ظاهر ڪيو پيو وڃي ته فوتين جو انگ 10 هزار تائين پهچي سگهي ٿو. گڏيل قومن جي عملدارن موجب امڪاني وڏي پيماني تي جاني نقصان کي نظر ۾ رکندي 10 هزار لاشن لاءِ باڊي بيگز حاصل ڪرڻ جون تياريون جاري آهن.
آمريڪي جيولوجيڪل سروي پڻ امڪان ظاهر ڪيو آهي ته زلزلي سبب فوتين جو انگ 10 هزار کان هڪ لک تائين پهچي سگهي ٿو. مقامي اختيارين موجب هن وقت تائين 1719 ماڻهن جي فوت ٿيڻ جي تصديق ٿي چڪي آهي، جڏهن ته 5034 ماڻهو زخمي ۽ 15 هزار 866 کان وڌيڪ ماڻهو بي گهر ٿي چڪا آهن.
زلزلي جي نتيجي ۾ لڳ ڀڳ 2500 عمارتون متاثر ٿيون آهن، جڏهن ته متاثر علائقن ۾ امدادي ۽ بچاءَ جون سرگرميون تيزي سان جاري آهن. ريسڪيو اهلڪارن زلزلي کان 106 ڪلاڪن پوءِ به هڪ 21 ورهين جي نوجوان کي زندهه ٻاهر ڪڍي ورتو، جنهن کي هڪ معجزاتي بچاءَ قرار ڏنو پيو وڃي.
ٻئي پاسي يورپي يونين زلزلي متاثرن لاءِ 50 لک ڊالرن کان وڌيڪ هنگامي امداد جاري ڪري ڇڏي آهي. يونيسيف جو چوڻ آهي ته هن قدرتي آفت کان متاثر لڳ ڀڳ 18 لک ماڻهن کي فوري انساني امداد ۽ سهائتا جي ضرورت آهي.
