چيئرمين پي ٽي آءِ بئريسٽر گوهر، نورين نيازي جي پنهنجي ڀاءُ عمران خان سان ملاقات کانپوءِ شير افضل مروت پاران ڪيل دعوائن جي ترديد ڪري ڇڏي آهي.
هڪ ٽي وي انٽرويو دوران قومي اسيمبلي جي ميمبر شير افضل خان مروت دعويٰ ڪئي ته عمران خان پنهنجي ڀيڻ عليمه خان بابت سخت پيغام ڏنو آهي، جنهن کانپوءِ هوءَ گذريل ٽن ڏينهن کان منظرعام تان غائب آهي. شير افضل مروت موجب عمران خان نورين نيازي سان ملاقات دوران عليمه خان کي اسٽريٽ موومينٽ کان روڪڻ جي هدايت جو حوالو ڏنو ۽ سوال ڪيو ته ان باوجود هوءَ احتجاجي سرگرمين ۾ ڇو حصو وٺي رهي آهي.
شير افضل مروت دعويٰ ڪئي ته عمران خان پارٽي کي عليمه خان کي سياسي معاملن کان پري رکڻ جي هدايت پڻ ڪئي. سندس چوڻ هو ته باني پي ٽي آءِ عدالتي رليف بابت ٿيندڙ اڳڀرائي کان به لاعلم هئا. هن وڌيڪ دعويٰ ڪئي ته عمران خان سپريم ڪورٽ وڃڻ ۽ ڪنهن به ڊيل بابت سوال ڪيو، جڏهن ته اهو به پڇيو ته کيس نواز شريف سان ڇو ملايو پيو وڃي.
ٻئي طرف پي ٽي آءِ چيئرمين بئريسٽر گوهر شير افضل مروت جي انهن دعوائن کي رد ڪندي انهن کي من گهڙت قرار ڏنو آهي.
