آمريڪي صدر ڊونلڊ ٽرمپ پنهنجي قتل جو خدشو ظاهر ڪيو آهي.
پرڏيهي خابرو اداري موجب، ڊونلڊ ٽرمپ پنهنجي قتل جو خدشو ظاهر ڪندي ايران تي قتل جي سازش جو الزام لڳايو آهي.
هن الزام هنيو ته هو ايران جي "هٽ لسٽ" تي شامل آهن ۽ ايران ڪيترن ئي سالن کان کين مئل ڏسڻ چاهي ٿو. هن چيو ته جيڪڏهن کيس ڪجهه ٿيو ته ايران تي اهڙي بمباري ڪئي ويندي، جيڪا اڳ ڪڏهن به نه ڏٺي وئي هوندي.
ٽرمپ چيو ته جيڪڏهن ايران سندس قتل يا قتل جي ڪوشش واري ڌمڪي تي عمل ڪيو ته ان جا انتهائي سنگين نتيجا نڪرندا. هن وڌيڪ چيو ته جيڪڏهن کيس ڪجهه ٿي ويو ته کيس اميد آهي ته ماڻهو کيس ياد رکندا.
هن اهو به چيو ته ايران ڏانهن هڪ هزار ميزائل نشانو بڻائي تيار رکيا ويا آهن، ۽ جيڪڏهن ايران ڌمڪي تي عمل ڪرڻ جي ڪوشش ڪئي ته وڌيڪ هزارين ميزائل به فائر ڪيا ويندا. هن دعويٰ ڪئي ته ضرورت پوڻ تي آمريڪي فوج کي ايران جي سمورن علائقن کي مڪمل طور تباهه ڪرڻ جا حڪم پڻ ڏنا ويا آهن.
ان کان علاوه، آمريڪي صدر سوشل ميڊيا تي هڪ پوسٽ ۾ دعويٰ ڪئي ته اسلامي جمهوريه ايران ساڻس ڳالهين کي جاري رکڻ جي درخواست ڪئي، جنهن تي هن اتفاق ڪيو، پر کين واضح طور ٻڌايو ويو ته جنگ بندي هاڻي ختم ٿي چڪي آهي.
ٻئي طرف، ايراني پرڏيهي وزارت جي ترجمان اسماعيل بقائي آمريڪي صدر ڊونلڊ ٽرمپ جي دعويٰ کي مڪمل طور رد ڪندي چيو ته ايران آمريڪا سان ڪنهن به قسم جي ڳالهين جي درخواست ناهي ڪئي.
