ڪراچي: جوڊيشل مئجسٽريٽ ڏکڻ منشيات فروشي جي الزام هيٺ گرفتار ملزمه انمول عرف پنڪي جي جيل ۾ سهولتون نه ملڻ خلاف داخل درخواست، جيل اختيارين جي وضاحت کانپوءِ نمٽائي ڇڏي.

ملزمه انمول کي جيل ۾ سهولتون نه ڏيڻ خلاف درخواست تي ٻڌڻي جوڊيشل مئجسٽريٽ ڏکڻ جي عدالت ۾ ٿي، جنهن دوران عورتن جي جيل جي سپرنٽنڊنٽ عدالت ۾ پيش ٿي.

عدالت پڇاڻو ڪيو ته ملزمه کي جيل ۾ دوائون ۽ ڪپڙا ڇو فراهم نٿا ڪيا وڃن؟ جنهن تي عورتن جي جيل جي سپرنٽنڊنٽ جواب ڏنو ته ملزمه عام ڪپڙا گهرائي پائي سگهي ٿي، ان تي اسان کي ڪو اعتراض ناهي.

عورتن جي جيل جي سپرنٽنڊنٽ عدالت کي ٻڌايو ته ملزمه جو علاج سول اسپتال ۾ جاري آهي، ۽ سول اسپتال جي ڊاڪٽر پاران تجويز ڪيل دوائون کيس فراهم ڪيون پيون وڃن.

عورتن جي جيل اختيارين جي موقف کانپوءِ عدالت ملزمه انمول جي درخواست نمٽائي ڇڏي.