تھران(ويب ڊيسڪ) ايراني پرڏيهي کاتي جي ترجمان اسماعيل بقائي چيو آهي ته تهران آمريڪي شرطن جو جواب موڪلي ڇڏيو آهي ۽ پاڪستاني ٽياڪڙ جي ذريعي ڳالهين جو عمل جاري آهي.

سومر ڏينهن هفتيوار پريس ڪانفرنس دوران آمريڪي تجويز جي حوالي سان ٻڌائيندي اسماعيل بقائي چيو ته جڏهن تهران 14 نڪاتي منصوبو پيش ڪيو ته آمريڪا ان تي پنهنجي خدشن جو اظهار ڪيو، جنهن جي جواب ۾ اسان به پنهنجا خدشا ظاهر ڪيا هئا.

سندس چوڻ هو ته گذريل هفتي آمريڪي ڌر طرفان عوامي طور تي 14 نڪاتي منصوبي کي رد ڪيو ويو، جنهن کانپوءِ اسان کي پاڪستاني ٽياڪڙ ذريعي سندن نڪتن ۽ شرطن جو هڪ مجموعو مليوهو.

ايراني کاتي جي ترجمان اِهو به چيو ته تهران طرفان 14 نڪاتي منصوبو موڪلڻ جي ٻئي ئي ڏينهن هنن کي آمريڪي شرط مليا هئا.

اسماعيل بقائي وڌيڪ چيو ته گذريل ڪجهه ڏينهن دپرام سمورن نقطن جو جائزو ورتو ويو ۽ ان جي جواب ۾ اسان جي طرفان ردعمل پڻ ڏنو ويو آهي، جڏهن ته پاڪستاني ٽياڪڙ جي ذريعي ڳالهين جو سلسلو جاري آهي.