ڪراچي: سنڌ حڪومت ڊجيٽل روٽ پرمٽ ۽ فٽنيس سرٽيفڪيٽ کانسواءِ هلندڙ پبلڪ سروس گاڏين خلاف ڪريڪ ڊائون جو فيصلو ڪري ورتو آهي. سنڌ جي ٽرانسپورٽ واري وزير شرجيل ميمڻ چيو آهي ته ڪيتريون ئي گاڏيون صحيح فٽنيس سرٽيفڪيٽ ۽ روٽ پرمٽ کانسواءِ هلائيون پيون وڃن، جڏهن ته ڪجهه گاڏين ۾ باهه وسائڻ جا اوزار به موجود ناهن، جنهن سبب مسافرن جي حفاظت خطري ۾ آهي.
هن چيو ته سمورين پبلڪ سروس گاڏين جي ڊجيٽل روٽ پرمٽن جي تصديق ڪئي ويندي، جڏهن ته دستي روٽ پرمٽ غير مؤثر قرار ڏئي منسوخ ڪيا ويندا. ڊجيٽل روٽ پرمٽ ۽ فٽنيس سرٽيفڪيٽ کانسواءِ هلندڙ گاڏين خلاف قانوني ڪارروائي ڪئي ويندي.
شرجيل ميمڻ موٽر وهيڪل انسپيڪٽرز کي اوچتا معائنا ڪرڻ ۽ خلاف ورزي ڪندڙن خلاف ڪارروائي جون هدايتون ڏنيون آهن. هن چيو ته خلاف ورزي تي ڏنڊ، روٽ پرمٽ معطلي ۽ لائسنس منسوخي جهڙيون ڪارروائيون ڪيون وينديون، جڏهن ته بار بار خلاف ورزي ڪندڙ آپريٽرن جا نالا بليڪ لسٽ ڪيا ويندا.
صوبائي وزير موجب ريجيونل ٽرانسپورٽ اٿارٽي ۽ موٽر وهيڪل انسپيڪشن ونگ جا آفيسر هر ٻن هفتن کانپوءِ ڪارروائين جي رپورٽ جمع ڪرائيندا. حفاظتي گهرجون پوريون نه ڪندڙ پبلڪ سروس گاڏين کي روڊن تي هلڻ جي اجازت نه هوندي.
